Mieres, Xixón, Llangréu y Siero son los escenarios nos que se pue disfrutar de la música asturiana esti fin de selmana. Güei vienres 14 a les 20h l’Antiguu Institutu de Xixón acueye una Nueche en Danza na que participen Pandereteros d’Anguaño y 6 Riales pa siguir colos XII Alcuentros de Músiques Asturianes. En Mieres entamen les fiestes de San Xuan y, dientro de la bayurosa programación, hai dos nos que los sones del país son protagonistes: el XXI Encuentro Coral La Mina Canta Unida y Ven Armar la Danza, Ver Armala Bien. Per último, 6 Riales tamién van tocar en Llangréu y Siero.
El XXI Encuentro Coral La Mina Canta Unida va axuntar a les corales asturianes Centro Asturiano de Oviedo, Más que Jazz de Xixón y l’Orfeón de Mieres xunto a Coros Halane de Cabezón de la Sal (Cantabria) y Coral Polifónica Estradense de Pontevedra. L’eventu tien dos cites nel Auditoriu Teodoro: el vienres 14 y el sábadu 15; dambes a les 20h. Per otru llau, pa puxar pol espardimientu de la cultura’l país ente les xeneraciones más mueves, el Conceyu Mieres entama’l sábadu 15 Ven Armar la Danza, Ver Armala Bien. A les 12h va haber un taller de danza prima pa reciella y mocedá empobináu polos grupos de baille L’Artusu, Ruxidera y Prau Llerón y a les 13h actúen La Bandina L’Arrancaera y el Coru del Conservatoriu de Mieres.
L’axenda complétenla otros dos conciertos del tríu de percusión tradicional 6 Riales: el sábadu a les 13h nes Fiestes de La Barranca (Güeria de Villar y Pumarín), nel conceyu Llangréu y el domingu 16 al mediudía na V Xornada de la Sidra, en Carbayín (Siero).
Na semeya Pandereteros d’Anguaño, que van actuar en Xixón
Suscríbite a les nuestres novedaes
