Urso Dakoff dan los sos primeros conciertos esti fin de selmana

A finales de xineru presentábase al traviés de les redes sociales un nuevu proyectu de música asturiana, Urso Dakoff. La banda ta formada por tres veteranos de la escena musical del país, Pepín de Muñalén al violín, Rodrigo Joglar al curdión, y Miguel R. Monteavaro a la flauta. Esti fin de selmana el tríu va dar los sos primeros conciertos: el sábadu a les 22h nel bar Castrillón de Bual y el domingu a les 13h en Muñalén.

Miguel R. Monteavaron presenta a esta formación como un grupu pa facer «música tradicional asturiana reellaborada a la manera europea contemporánea». Nesti sen, desplica que «el bal-folk ye una etiqueta de folk baillable y escuchable européu. Respuende a los festivales de baille del centru d’Europa y que s’espardió pel restu del territoriu». «N’Asturies hai mui pocos grupos qu’usen esti sellu y en realidá lo que fai Urso Dakoff ta conectáu colo que tán faciendo en Galicia, en Cataluña, en Francia…», añade.

La estética d’un faquir

«Urso Dakoff ye’l nome artísticu del faquir de Muñalén. Ehí hai un fakir que ta vivu, que trabayó en varios circos de renome internacional y por eso tenemos esa estética qu’amosamos nes semeyes que nos fizo’l fotógrafu llibanés Nabil Amhaz», esclaria Miguel R. Monteavaro sobre ún de los aspectos que de primeres más llamó l’atención del proyectu.

P’acabar, el músicu de Bual comenta qu’esta banda en realidá nació a finales de 2019: «pensábemos qu’había inda muncho repertoriu que trabayar, ficimos el trío y llevamos ensayando dende aquella, pero pillónos la pandemia, los confinamientos, zarros perimetrales y tuvimos una actividá intermitente». Sicasí, dende’l branu pasáu yá trabayen «en serio», y la primer muestra d’ello va ser los dos conciertos que van dar esti fin de selmana.