Entamen les presentaciones de “Hai una llínia trazada”, l’ensayu sobre la historia de la música asturiana

Esti xueves 1 de xunetu entamen les presentaciones de “Hai una llínia trazada. Historia de la música asturiana”, l’ensayu de Xune Elipe col que ganó’l XXVI Premiu ‘Máximo Fuertes Acevedo’ de la Conseyería de Cultura, Política Llingüística y Turismu. Va ser a les 19h na Casa Cultura de Santuyano (Bimenes) y asina presenta’l propiu autor l’eventu:

«La obra tovía nun ta publicada, espérase qu’a la vuelta’l branu yá pueda tar el llibru físicamente, pero nestes primeres presentaciones voi facer un percorríu pela historia de la música d’espresión asturiana dende l’antigüedá hasta anguaño. El formatu tien la intención de ser cronolóxicu, mui dinámicu y emplegando bien de materiales audiovisuales (semeyes, grabaos, vídeos…), col aquel de facer la charra lo más entretenida posible.

La primer parada va ser en Bimenes, pa depués siguir per Colunga, Villaviciosa, Xixón, Corvera, Avilés y Llangréu.¿Cuál ye’l primer resclavu rellacionáu cola música n’Asturies? ¿Qué instrumentos conocemos de los astures? ¿Qué papel tuvo la música nel reinu asturianu? ¿Cómo se llamaba’l primer xuglar del país? ¿Cuándo nació l’asturianada? ¿Cómo influyó’l franquismu na nuestra escena sonora? ¿A qué llamamos música d’espresión asturiana?».

Dexa un comentariu

X