L-R foi la casualidá que marcó l’entamu d’un folk nuevu y amosó que lo que siempre funcionara por individual non solo gustaba xunto, sinón que yera la novedá que la música tradicional necesitaba. Esti proyectu ñaz nel añu 2015 y ye’l resultáu de la mezcla de los intereses comunes de les persones que lu formen. Rubén Bada tocaba un blues demientres que Leticia Baselgas interpretaba cantares tradicionales acompañada pola pandereta. A pesar de que los xéneros coexistieren, esta sonoridá aportó daqué completamente nuevo.
El folk dexó de ser folk, pero tampoco yera blues; a esta xeneración nueva de cantares que convirtieron lo vieyo en vanguardista nomáronlo “post-folk asturianu”. Nuna época na que’l folk n’Asturies -que siguía siendo un xéneru de nichu- paecía estancáu, ensin relevu xeneracional nin propuestes innovadores, L-R demostraron qu’entá quedaben coses por facer y arrimaron la música tradicional a un nuevu públicu.
Depués d’esta primer propuesta, qu’asentaron nun primer álbum d’estudiu nomáu post-folk-asturianu, llegaron N.O.S y V.O.S. Nestos LP diferénciense trés etapes del grupu que siempre comparten los mesmos elementos comunes: lo vieyo, lo nuevo y lo que ta por facer.
Los cantares que conformen el repertoriu de L-R reflexen que los sintetizadores, la electrónica, la guitarra eléctrica, la pandereta y les melodíes tradicionales son elementos que, existiendo por individual, meyoren cuando conviven.
Con esta publicación continuamos la estaya de playlists nel nuestru perfil de Spotify. Inspirándonos nes This Is: que la plataforma musical sueca dedica a artistes de renome, Musicasturiana.com facemos lo propio centrándonos nos cantares de los grupos más destacaos de la música’l país. Esto ye: Dixebra, Esto ye: Llan de Cubel, Esto ye: Mariluz Cristóbal Caunedo, Esto ye: Nuberu, Esto ye: Muyeres, Esto ye: Nacho Vegas y Esto ye: Felpeyu foron les anteriores incorporaciones. La escoyeta musical d’estes playlists nun respuenden namás a criterios algorítmicos o a los temes más populares de cada formación.
Suscríbite a les nuestres novedaes
