Nuna escena de la película El maestro que prometió ver el mar, el profesor Antoni Benaiges, al traivés de la voz de Enric Auquer, decía: «Será genial, porque aprenderemos y a la vez nos divertiremos». Tolos docentes con vocación sabemos que l’entusiasmu contáxase, que les ganes por deprender con y de la reciella son un imperativu categóricu de too bon maestru o maestra. Cuando conocí a Nel, nun foi nel papel de maestru, foi nun Semando Fest, nel que yo dende l’escenariu vilu baillar con Lluis Ángel, esa imaxe téngola grabada na tiesta porque tresmitíen tanto arte, y yo nunca nun viera a dos homes baillar xuntos col xeitu y bon facer d’esos dos. Aquella sala tan enllena de xente na Lata Zinc foi l’entamu, ensin sabelo, de la mio rellación col baille y la pandereta. Aquel febreru de 2023, sintiendo los cantares d’Algaire, la idea de garrar una pandereta y xuntame con más muyeres tornóse prestosa. Poder sacar de la tiesta los cantares de mio güelu y facer son con un pandeiru.
«Naquel Semando Fest, sintiendo los cantares d’Algaire, la idea de garrar una pandereta y xuntame con más muyeres tornóse prestosa. Poder sacar de la tiesta los cantares de mio güelu y facer son con un pandeiru»
La primer torga, como siempre nesta vida moderna que llevamos, yera’l tiempu. Pela mio zona (Cuideiru), nun habia munchos sitios onde deprender, dir camín de Xixon o Uviéu, yera incompatible, lo más cerca de Samartín yeren too grupos yá creaos, con tol respetu del mundu, un grupu merez muncha mas dedicación y tiempu del qu’una maestrina opositora podía dedica-y, asina qu’aquello foi quedando nuna idea, una más de tantes que tenemos, pero nun podemos llevar a práctica.
Pero si dalgo me diz la vida, ye que’l tiempu dátelo too, respuestes y oportunidaes. Quixo la causalidá qu’una comida nes fiestes de Pandu, un pueblín de Grau, na casa del mio colega Alejo, ellí topara yo a Muyeres por Grau. Yeran la hostia y yo tenía unes ganes de dir p’ellí a facer ruíu y echar unos cantares, pero ónde diba yo ensin saber nada.
«Pela mio zona nun había munchos sitios onde deprender y Nel cuntóme la idea del taller de pandereta. En setiembre foi l’entamu, namás y nada menos qu’en trés conceyos: Grau, Candamu y Salas. Axallá les xentes de lo rural apreciemos estes iniciatives y caltengamos lo nueso»
Na sobremesa falé con Nel, y cuntóme una idea coyonuda, un taller de pandereta, eso sí yera pa min. Más muyeres, unes sabíen, otres non, la cosa yera echar un bon ratu. En setiembre foi l’entamu, namás y nada menos qu’en trés conceyos: Grau, Candamu y Salas. La primer clas foi, como tolos empiezos, con dalgo de vergoña y mieu, pero Nel facíalo fácil. Y asina foi surdiendo col pasu de les selmanes el deprendizaxe, la so paciencia ye infinita, pero ensin dulda la vocación ye’l motor de que les sos clases furrulen y nun nos esmoleza si por dalguna causa tenemos que faltar.
Traer los sones de los nuestros raigaños, nun escaecer l’arte de los nuestros, esi patrimoniu inmaterial que son el baille, la gaita y la pandereta, too eso ye llabor de Nel Villanueva Rodriguez. Axallá les xentes de lo rural apreciemos estes iniciatives y caltengamos lo nueso, faciendo xuntances al rodiu de la musica, qu’a la fin ye lo que paga la pena. Gracies Nel por averanos siempre a facer memoria y ver les coses guapes que hai nel llau bonu de la nuesa hestoria. Nun duldes que tolos tos alumnos y alumnes vamos facer alcordanza de tolo que nos tas dando cada selmana nos vericuetos del rural asturianu.
Semeya de Lucía Garó nel I Semando Fest
Suscríbite a les nuestres novedaes
