POP PIQUIÑÍN – Llibru + CD Pop Piquiñín. Una escoyeta de les canciones n’asturianu de Petit Pop

Pop Piquiñín. Una escoyeta de les canciones n’asturianu de Petit Pop ye un cancioneru ilustráu por Pedro Balmaseda qu’inclúi un CD coles canciones más populares de la Pop Piquiñín y tamién los sos últimos singles, traducíos por primer vez al asturianu pa esta cuidada edición.

«¿Quién nun quedría que-y contaren la so vida como si fora una canción? Pues xusto eso ye lo que fai Pop Piquiñín, alter ego de la popular banda Petit Pop cola que lleven editaos dende hai quince años tolos sos discos traducíos al asturianu. Narrar, como una crónica musical, con tenrura y abondu sentíu del humor, la infancia y esi tiempu dalgo alloriáu que se vive nes cases cuando llega un miembro nuevu a la familia», despliquen dende La Fabriquina.

D’esa rellumante discografía de seis discos n’asturianu–Pop Piquiñín, Cantares pal coche, Surf na bañera, Andamos en bici, Nun mos gusten los llunes, Que nun te tarreza la naturaleza– sal agora esti llibru-discu compuestu por una escoyeta de diez cantares -ente los qu’hai dellos inéditos n’asturianu– onde les lletres acompañénse coles ilustraciones del dibuxante Pedro Balmaseda, diseñador de cabecera de la banda, y tamién por anécdotes y curiosidaes sobre cada canción contaes pol propiu grupu.