SANTI CALEYA – Llibru ‘L’acompañamientu d’asturianada’

L’acompañamientu d’asturianada ye’l trabayu del pernomáu gaiteru Santi Caleya dedicáu a la rellación ente la gaita y el cantu más representativu de la cultura asturiana, l’asturianada. A lo llargo de 200 páxines, el músicu y mayestru ayerán percuerre aspectos d’esti xéneru como la so historia, los pioneros intérpretes, les sos característiques, la presencia de la gaita dientro de la tonada, o’l papel del gaiteru a la hora d’acompañar a la canción asturiana. Amás d’ello, la estaya de patrones y melodíes axunta les partitures de 55 cantares, dando como resultáu una obra fundamental pa estudiar la canción asturiana dende la perspectiva de la gaita.

«Preséntase esti trabayu como un averamientu a la conocencia de la tonada dende’l puntu de vista interesáu del gaiteru. Nun pretende ser un estudiu musicoloxicu profundu, sinón qu’hai qu’entendelu como un complementu a lo espublizao endagora. La idea ye dar un pocu lluz a dellos aspectos esenciales que-y puedan echar un gabitu al neófitu nesta disciplina. Pero la intención cimera ye que fuera una guía básica p’apurrir una migaya d’orde al caos, teniendo siempre en cuenta a quién va dirixíu: mayestros y escolinos de gaita, col envís de trabayar la didáctica d’una estaya de la música tradicional, dacuando abegosa por mor de la so dificultá d’interpretación y representación». Con estes pallabres Caleya introduz esta obra única dientro de la música asturiana.

L’acompañamientu d’asturianada ta dividíu en dos partes. La primera percuerre aspectos teóricos, musicolóxicos, históricos y hasta anécdotes personales rellacionaes cola asturianada en xeneral y cola so rellación cola gaita. La segunda, ye la que trescribe la interpretación a la gaita de 55 melodíes perconocíes dientro de la canción asturiana. Gracies a la publicación d’esta obra Santi Caleya da un pasu más na so bayurosa trayectoria na que destaca ser mayestru gaiteru, autor del llibru Gaita asturiana: método para su aprendizaje, fundador y director durante 11 años de la Banda Gaites La Viga Travesá y músicu de La Bandina, Folkgando y La Bonturné.