XENTIQUINA – CD ‘El Sapu y La Lluna’

Últimu discu que publicaron Xentiquina, nel añu 2009. Na grabación d’esti trabayu participaron dellos de los músicos más renomaos del país. Inclúi tamién los cantares en versión karaoke.

Xentiquina ye una de les formaciones musicales más importantes pa la llingua asturiana, yá que foi l’únicu grupu formáu esclusivamente por neños y neñes y, per 25 años, foi la única formación que facía cantares n’asturianu pa la reciella. La so historia ye inseparable de la del mayestru Nacho Fonseca, que nel cursu 1986-1987 cuando daba clases en Porrúa, decidió facer un grupu musical con dellos de los sos escolinos. Llamáronse Seliquín y llegaron a grabar un discu. Col treslláu de Fonseca a dar clases a Lieres, ésti reconvirtió’l proyectu en Xentiquina. Foi una revolución pa la música n’asturianu, una ferramienta imprescindible pal enseñu de la nuestra llingua y tou un éxitu; asoleyaron dellos discos, dieron un centenar de conciertos per escueles y escenarios del país y involucraron a cientos de neños y neñes na xera de cantar n’asturianu.