En 1987, la Sociedad Fonográfica Asturiana asoleyó un vinilu compilatoriu monográficu con doce grabaciones d’Obdulia Álvarez «La Busdonga», una amuesa del so xeitu d’interpretar la tonada asturiana en dellos formatos: a solo, col acompañamientu de gaita del so hermanu Ángel y, tamién, con Baldomero Fernández al pianu. La Busdonga (1896-1950) foi una de les más grandes cantadores d’asturianada y les sos abondes grabaciones fueron y son una fonte inagotable d’inspiración pa toles amantes de la canción asturiana. P’afondar nello, falamos con Anabel Santiago y Luis Francisco Álvarez Pola, dos figures venceyaes al xéneru con un conocimientu fondu de l’artista que nos apurren claves y datos inéditos sobre la so carrera y relevancia. Con esti vinilu siguimos la estaya de discu del mes; na que vamos dir analizando dalgunos de los trabayos discográficos más destacaos de la música asturiana y acompañándolos d’una ufierta na tienda online.
Dende’l to puntu de vista, ¿qué suponen estes grabaciones na historia de la música asturiana?
La Busdonga ye la gran referente de les cantantes contemporánees, polo qu’esti discu supón un imprescindible pa entender y deprender el repertoriu básicu y fundamental de la tonada en femenín. Ella ye, digamos, la gran mayestra de toles que vinimos dempués.
«La Busdonga ye la gran referente de les cantantes contemporánees, la gran mayestra de toles que vinimos dempués. Ensin esti discu, munches de les muyeres que cantamos tonada tuviéremos perdío gran parte del repertoriu que dempués inspiró pa facer nuevos trabayos»
¿Qué influencia tienen los rexistros de La Busdonga recopilaos nesti discu n’asturianada de la época? ¿Y na d’anguaño? ¿Por qué ye importante caltener y reivindicar estes grabaciones históriques?
La importancia recai na non perda del legáu vocal y musical que La Busdonga dexa a la tonada. La so aportación como pionera de la tonada cantada al pianu, y la so forma interpretativa suponen el gran plus pa tornase referente del xéneru.
Ensin esti discu, munches de les muyeres que cantamos tonada tuviéremos perdío gran parte del repertoriu que dempués inspiró pa facer nuevos trabayos. La musicalidá, los xiros característicos d’ella, la bravura, l’atrevimientu colos arreglos musicales… Falar de la tonada ensin estes grabaciones históriques ye cuasi inimaxinable.
¿Cuál sería’l puntu de partida pa entamar a falar sobre La Busdonga?
Poco sabemos de quien foi una de les primeres figures femenines en trescender a la memoria colectiva nel campu de l’asturianada. Obdulia Álvarez Díaz yera fía de Miguel Álvarez y Victoriana Díaz, nacíos en Santamarina de Piedramuelle y La Fuente la Plata (Uviéu), respectivamente. Nació nesti últimu llugar, en 1896, al que se refirió en delles entrevistes como San Pedro de los Arcos; en tou casu, na redolada próxima a L’Argañosa. Con namás catorce años casó con «Manuel el maño», apodáu asina pola so destacada maña nel xuegu de les cartes. A ello débese que, al paecer, Obdulia tamién foi conocida como «la maña» nel so entornu más cercanu.
¿D’ónde-y vieno’l nome de La Busdonga?
El so pá Miguel yera vixilante nes obres del túnel de La Perruca a Busdongo, llocalidá na que moraron per aquel tiempu. Por esti motivu, el so pá adoptó’l nomatu que llueu s’estendería al restu la familia. Tamién paga la pena citar qu’esistió una casa de comides y sidrería asitiada en La Fuente la Plata, conocida como Casa El Busdongo o La Busdonga. Quiciabes pudo pertenecer a la so familia, magar que darréu treslladáronse a Mieres, onde abrieron un establecimientu de característiques similares, enantes d’afitar la so residencia en Xixón a partir de 1934.
«L’afición d’Obdulia forma parte d’una llarga tradición familiar que podemos remontar siquiera hasta’l so tataragüelu maternu»
¿Cómo nació la so afición pola música?
L’afición d’Obdulia forma parte d’una llarga tradición familiar que podemos remontar siquiera hasta’l so tataragüelu maternu, el renombráu gaiteru xixonés Antonio González Reguera, «Antón del aire». La ma d’Obdulia –bisnieta d’«Antón»– siguió col arte de tocar la gaita y foi quien deprendió al so fíu Aurelio a tocala, quien llegó a algamar méritos abondos como pa empatar col «Gaiteru de Libardón» nun concursu celebráu en Nava. Esta afición tamién s’estendió con gran aciertu a otru de los hermanos: «Ángel el Busdongu». Ésti últimu, amás d’acompañar a Obdulia en numberoses grabaciones, formó xunto con José Sánchez, «el Tambor de L’Abadía», una de les pareyes de gaita y tambor más reconocíes a mediaos del sieglu pasáu. Amás de gaitera, la ma d’Obdulia cantaba de forma escepcional, arte nel que tampoco desmerecían nin el so home nin el restu d’hermanes de l’artista.
¿Cómo dio’l saltu La Busdonga a los grandes escenarios?
Desconocemos cómo fueron los entamos d’Obdulia nun Uviéu qu’a principios de sieglu XX vivía una verdadera fervencia musical, especialmente nel campu coral. Alredor de les primeres mases corales confluyeron y diéronse a conocer grandes figures del cante asturianu. Como exemplu, en 1927, l’Asociación Coral e Instrumental Ovetense –Orfeón Ovetense– axuntaba un caldu de cultivu tan numberosu y inquietu que, tres una dixebra, nació la Coral Vetusta, que superaría al tiempu’l centenar de voces. Resulta interesante comprobar que, un añu más tarde, La Busdonga yá apaez nos programes de dellos conciertos d’esta formación executando cantares asturianos, como tamién lo facíen Fernando Menéndez o Carmina Fernández Buelta, ente otros. Nun podemos concretar si Obdulia yera coralista de la entidá, pero sí guardaba parentescu con José Fuertes Fanjul, que foi tenor del Orfeón Ovetense y, darréu, de la Coral Vetusta, de la cual sería’l so postreru tesoreru.
«Alredor de les primeres mases corales confluyeron y diéronse a conocer grandes figures. La Busdonga yá apaez nos programes de dellos conciertos de la Coral Vetusta en 1928 executando cantares asturianos»
Nesos años, ¿foi importante la figura del pianista y compositor Baldomero Fernández Casielles?
Al mio pensar, foi determinante nel desenvolvimientu de la carrera de la cantante. Como dicíamos, en 1928 atopamos a los referíos Fernando Menéndez, Carmina Fernández Buelta, La Busdonga y La Coral Vetusta alternando n’espectáculos entamaos por esta masa coral. Esi mesmu añu grabaron toos ellos pal sellu Gramófono, siendo Baldomero autor, arreglista o acompañante al pianu de la mayoría d’estos temes. El músicu carbayón yá tenía la esperiencia de grabar en 1921 pa la mesma compañía discográfica, acompañando entós a Ángel González, «El Maragatu». Pero, por si fora poco, namás un añu más tarde, en 1922, Ofelia d’Aragón yá grabara dos temes asturianos de la so autoría: Torna la gocha y Adiós Rosina.
Pienso que Baldomero topó en La Busdonga una voz con abondes posibilidaes. La so dilatada esperiencia dexó-y exercer sobro ella un prudente maxisteriu, arriqueciendo la so técnica y aumentando por tanto les sos posibilidaes, pero respetando ciertos marxes en beneficiu de la so impronta popular. Nun escaezamos qu’esti músicu alternaba al pianu con Saturnino del Fresno en conciertos a cuatro manes y yera capaz d’improvisar música de calter descriptiva nes películes mudes. Esti talentu, sumáu a la so dilatada esperiencia, supo evitar que calaren nella amaneramientos vocales tan del gustu d’otros xéneros en boga, inclusive de cayer nun academicismu escesivu. Sicasí, Baldomero finó con sesenta y tres años, en 1934, namás seis años dempués d’efectuar aquelles grabaciones de 1928, que saldríen al mercáu un añu más tarde.
«Baldomero topó en La Busdonga una voz con abondes posibilidaes. Supo evitar que calaren nella amaneramientos vocales d’otros xéneros, inclusivo de cayer nun academicismu escesivu»
¿A qué crees que se debió la trescendencia de La Busdonga?
Pienso que la trescendencia de la so figura débese a delles razones. La principal ye que na so persona axuntáronse una voz con posibilidaes y una personalidá de cierta espontaneidá, con vocación d’artista y predispuesta p’acometer distintos tipos de propuestes y repertorios. Sabemos que non solo dominaba l’estilu asturianu, sinón tamién el flamencu y jotescu, que nun llegó a grabar magar la so voluntá de facelo. En segundu llugar, el contactu establecíu con Baldomero Fernández arriqueció-y y abrió-y les puertes d’una nueva dimensión sonora: nuevos escenarios y públicos, les grabaciones discográfiques y la radio. Fernando Entrialgo, cantante y amigu con quien comparto l’afición del coleicionismu de discos de pizarra, lleva documentaos hasta ventinueve rexistros en pizarra -venticuatro pal sellu Regal y cinco pa Gramófono- coles sos respectives reediciones en distintos sellos. Resulta esti un númberu ablucante en comparanza col que dexaron grabaes otres coetánees; una tendencia que se ruempe cola apaición de la cantante quirosana Diamantina Rodríguez. Como resultáu d’estos rexistros sonoros, la so voz entró en numberosos llares, non solo al traviés de los discos, sinón tamién de les emisiones radiofóniques d’estes grabaciones. Asina, a los pocos meses de qu’estos rexistros salieren al mercáu, la so voz yera retresmitida n’estremaes radios nacionales, y inclusive na CMW cubana onde la siguía una peramplia colonia asturiana.
«La trescendencia de La Busdonga débese a delles razones. La principal ye que na so persona axuntáronse una voz con posibilidaes y una personalidá de cierta espontaneidá, con vocación d’artista y predispuesta p’acometer distintos tipos de propuestes y repertorios»
¿Qué supunxeron estes grabaciones pa la hestoria de la música asturiana?
Al traviés de la tradición oral sabemos que munches muyeres de la so dómina algamaron cierta reconocencia nel arte del cantar de l’asturianada. Sicasí, bien poques tuvieron la oportunidá de grabar y, naquel tiempu, nenguna pudo facelo cola intensidá de La Busdonga. Los sos rexistros establecieron un canon interpretativu y el so repertoriu foi imitáu, de manera prácticamente inflexible, especialmente nos concursos que surdieron a partir de los años cuarenta y cincuenta hasta los nuesos díes. En 1948, el diariu Región convocaba la primer edición del históricu Concursu de Canción Asturiana. La Busdonga intervieno nél fuera de concursu y acompañada cola gaita pol so hermanu Ángel, lo que nos da una idega de la reconocencia de la so figura. Asina, la cantante quirosana Diamantina Rodríguez, quien medró sintiendo la so voz al traviés de los discos de pizarra, algamó un segundu premiu naquel mesmu certame. Naquella ocasión interpretó seis cantares, de los cualos tres yá grabara La Busdonga. La influencia d’Obdulia na carrera de Diamantina tamién se fai patente na recuperación de l’asturianada acompañada col pianu. Otru exemplu tenémoslu nel III Concurso y Muestra de Folklore Ciudad de Oviedo –celebráu de payares de 1994 a mayu de 1995– al establecer nes sos bases una llista de venti cantares ente la escoyeta pa interpretar como obligatorios. D’estos, ocho yá fueren grabaos por La Busdonga, lo que supón un 40% del repertoriu femenín. D’esta manera, la nuesa cantante foi afitándose como una figura d’ineludible consulta y referencia pa les nueves xeneraciones, creándose un constructu de «cantares pa muyeres». Con tou y a pesar d’esta trescendencia pa La Busdonga, el fechu de grabar nun-y supunxo un reseñable beneficiu económicu, pues llamentábase de cobrar la «miseria» de doscientes pesetes.
«Sabemos que munches muyeres algamaron cierta reconocencia nel arte de cantar asturianada, pero bien poques tuvieron la oportunidá de grabar y, naquel tiempu, nenguna pudo facelo cola intensidá de La Busdonga»
¿Qué trescendencia tuvo esti recopilatoriu de La Busdonga?
Ensin dulda foi de gran importancia, porque daquella l’accesu a les fontes sonores orixinales yera bien difícil y llendáu. Esti recopilatoriu con doce temes foi presentáu en discu de vinilu’l 18 de febreru de 1988 y pertenez a una colección publicada pola Conseyería d’Educación, Cultura y Deportes –presidida por Manuel Fernández de la Cera– y la Sociedad Fonográfica Asturiana. Nella hai que destacar el llabor de quien foi’l productor d’esti trabayu, el tamién cantante d’asturianada Luis Estrada, cola busca, llocalización y elección de los rexistros sonoros meyor calteníos. Equí nun quixera dexar de reconocer el trabayu de dos persones que dieron les más arrogantes amueses nel enfotu de salvaguardar y compartir esti patrimoniu sonoru; refiérome a Silvino Antuña y Javier el de Arroes.
¿Qué influencia tuvieron estos rexistros de La Busdonga na actualidá?
Solo fai falta revisar los repertorios interpretaos poles cantantes asturianes, tanto nos concursos como nes producciones discográfiques, pa dase cuenta. La Busdonga ye visitada y revisitada de forma constante poles distintes xeneraciones hasta anguaño; toes coinciden en reconocer a la cantante uvieína como una referente.
«Les xeneraciones posteriores de cantantes asturianes foron les que revalidaron la so figura y obra, convirtiéndola más que nuna lleenda, en tou un símbolu y referencia»
¿Crees qu’Obdulia gozó siempres de reconocencia y fama, o esta foi aumentando col tiempu?
Como toa carrera artística, tuvo sometida a momentos de mayor y de menor repercusión. Amás, la figura de La Busdonga entá zarra dellos enigmes frutu d’un tardíu y escasu abordaxe de la so figura, lo que dio llugar a la construcción de diversos discursos, más o menos acertaos, alredor de la so persona. Cuntó col apreciu de los sos compañeros y del públicu, qu’enllenó ‘l Teatru Principáu d’Uviéu nun sentíu y concurríu homenaxe que-y foi brindáu’l 19 de marzu de 1955. Los sos díes finaron en Xixón un 29 de xunetu de 1960 con malpenes sesenta y cuatro años. El so funeral celebróse al otru día na ilesia de San Lorenzo, recibiendo sepultura nel campusantu de Ciares. Cabría esperar que nos siguientes díes la prensa recoyera abondes referencies a la so vida y obra, pero lo cierto ye qu’esti fechu pasó casi desapercibíu. Tardaríen n’apaecer delles biografíes, más bien curties a tenor de la so dimensión, y tuvieron que trescurrir cuasi cuarenta años –1998– pa que la so ciudá natal-y brindara una cai en La Corredoria. Pela contra, foron les xeneraciones posteriores de cantantes asturianes quienes vinieron revalidando la so figura y obra, convirtiéndola más que nuna lleenda, en tou un símbolu y referencia.
Suscríbite a les nuestres novedaes
