En 2009 el rock n’asturianu taba viviendo ún de los meyores momentos de la so historia. Dixebra y Los Berrones llevaben más de venti años n’activo siendo los indiscutibles ‘patriarques’ del xéneru; la segunda xeneración d’esti estilu afitábase gracies a que Skontra, Skama la Rede y La Tarrancha yá teníen dos discos asoleyaos y una bultable presencia enriba los escenarios; y, amás, había una fola nueva de grupos –Gomeru, Adizión Etílika, Misiva, Fala Non Caduca, Sambre, Bacotexo– que siguíen el camín y trabayaben pa consolidar una escena que per muncho tiempu foi inestable. Esa vitalidá viose reflexada tamién en Ye lo que nos pasa, un compilatoriu editáu pola Xunta Pola Defensa de la Llingua Asturiana qu’axuntaba a toes estes banques que facíen rock, punk, ska, reggae, pop-rock Oi! o hardcore n’asturianu. Ye nesti contestu cuando Dixebra llanzó Amor Incendiariu, ún de los sos trabayos más destacaos.
El 1 de payares de 2009 el festival Llanes al Cubo acoyó la presentación del que sería l’octavu discu de la formación avilesina. Foi un conciertu perespecial nel que la banda que daquella taba formada por Xune Elipe (voz), Primi Abella (guitarra), Javi Rodríguez (baxu), Eladio Díaz (saxu), Agus Lara (trompeta), Sergio Rodríguez (técnicu de soníu) y Jorge Cambareli (batería y polos dos componentes que s’estrenaben naquel discu –Llorián García (gaita) y Rubén Bada (guitarra y bouzuki)-; tuvo acompañada de collaboradores como DJ Pimp (samplers y skratches) y Lisardo Prieto (vigulín) que representaben la mestura ente’l folk y la electrónica, ente’l rock y el rap, ente los soníos xamaicanos y los celtes; un reflexu de la diversidá presente en tola trayectoria de Dixebra y que n’Amor Incendiariu diba dar un pasu más, anque col punk y el folk como pegoyu.
El discu ta formáu por 14 temes con temátiques bien variaes -nún d’ellos estrenábase l’escritor Pablo Texón como lletrista de Dixebra- que nel llibretu foron acompañaos polos diseños de David García Lezink. Precisamente, l’arte del discu foi tamién una de les señes d’identidá, con esa llata gasolina en forma corazón y la cerilla que diba dientro del llateral del super jewel box -nome técnicu del formatu físicu-. A la fin, foi una obra cuidada al máximu bien seya dende’l puntu de vista de la música, les lletres, la producción o’l diseñu.
Unes selmanes enantes del llanzamientu d’Amor Incendiariu, el portal Fnast.net -continuación del fancín Fechu n’Asturies y antecedente de Musicasturiana.com- dedicó una pieza audiovisual a esti trabayu. Nella falen cuasi tolos componentes del grupu de caún de los cantares, de delles novedaes de Dixebra naquel momentu -como la incorporación de sonoridaes más folkis-, y de los proyectos que teníen próximamente -como’l discu Versióis eonaviegas-. Como curiosidá, como la pieza ta grabada en Tutu Estudios pueden sentise arreglos que llueu nun foron incluyíos nos cantares y ver cómo Dixebra finalmente fizo un cambiu nel tracklist del álbum, que tendría una continuación cola publicación del EP Bailla la crisis.
Suscríbite a les nuestres novedaes
Un comentario
Ye un discu que me prestó dende la primera vegada que lu sentí y qu’entá güei escúcholu muncho. Más qu’otros que salieron depués.