‘Llariegu’, un tiempu nuevu pa la electrónica de raigañu

Abril de 2020. Tábemos nel confinamientu por mor del COVID-19; un andanciu que traxo munches coses males y buenes al empar. Una de les positives foi que, dempués d’esos meses, hubo un xorrecimientu cultural novedosu que se caltién hasta los nuestros díes. Fueron munchos los proyectos musicales de dientro y fuera d’Asturies qu’entamaron a facer música con otru xeitu; incorporóse una xeneración nueva a la creación musical; y espoxigó’l mirar a la identidá propia como fonte d’inspiración y como discursu creativu. Toos esos ingredientes taben cocinándose nuna pota que, un 26 d’abril de 2020, aborboyó cuando Fruela 757 abre la so canal de YouTube y publica’l videu de ‘O Garutiño‘. A los pocos díes llanzaría nesta plataforma y en Bandcamp Llariegu, un discu que marcaría un tiempu nuevu pa la electrónica de raigañu.

Ye verdá qu’entemecer música tradicional y electrónica nun ye nuevo; ye daqué que lleva pasando dende hai más de trés décades. Sicasí, Javi Suárez -el productor xixonés que ye l’alter egu de Fruela 757-, entamó’l so llabor en 2008 con una fórmula y una constancia que nun se manifestara enantes. Y, d’ente tola so bayurosa producción, Llariegu ye ún de los álbumes más destacaos por varies razones. Por sorrayar dalgunes: ta enllenu de temazos, supunxo l’estrenu audiovisual d’esti artista -publicó nesos primeros díes de mayu los videoclips de los temes ‘Cabrúñame la gadaña‘, ‘Carretera d’Avilés‘ y ‘Páxarinos‘, que tán dientro’l discu, y llueu llegaríen otros más-; y ye una reivindicación del pop llariegu -pa ello samplea al grandísimu y recordadísimu Damián Barreiro na pista ‘Llariegu (ft Horros y Frixuelos)‘-.

Amás de too esto, plantó una semiente qu’a los meses dio los sos frutos col nacimientu d’otros proyectos artísticos que tamién trabayen cola música electrónica y l’asturiana: Llevólu’l Sumiciu, Ferla Megía y L.lercia. Son nomes que, xunto a otros como’l mentáu Fruela 757, Tasio, PVXARRA o Bimenes Underprau, conformen una escena qu’axunta electrónica con identidá asturiana y con otros soníos del sieglu XXI, que paez que va consolidándose adulces gracies a una producción discográfica cada vez mayor; a la continuidá nel tiempu d’estos proyectos; y a que, na mayoría de los casos, tamién tienen repercusión enriba los escenarios. P’afondar más no que supunxo Llariegu y la so heriede, falamos con Pablo Alonso de Llevólu’l Sumiciu, Lucía Garó de L.lercia y Ferla Megía, que dan la so opinión sobre esti álbum fundamental de la música asturiana.

¿Qué significó pa ti esti discu cuándo salió? ¿Y agora cola perspectiva del pasu del tiempu?

Llariegu ye un discu qu’apaeció nun momentu mui especial pa mi. Va poco que descubriera lo que taba pasando a nivel estatal cola música de raigañu, colos primeros trabayos de Baiuca, Castora Herz o Califato 3/4, y yo yá taba faciendo los mios primeros esperimentos con Llevólu’l Sumiciu. El mio primer contactu foi col vídeu de ‘O Garutiño’. Recuerdo que conecté munchísimo con esi tema. Dempués, sintiendo’l discu, la variedá de ritmos y soníos foi dalgo que m’impresionó. Javi tien un estilu de producción mui personal. Mientres otros productores s’esfuercen en definir un soníu mui concretu, Javi siempre tien esa llibertá de facer ensin prexuiciu, de pasar de reguetones seles y profundos a salsa pasando pel dub. A mi influyóme muncho, y pa que te faigas una idea, l’únicu remix que caltenemos anguaño nel directu ye’l de ‘La Raxa’, ¡un tema d’esi discu!.

Viéndolo en perspectiva, veo Llariegu como un discu clave na historia de la música de raigañu asturiana. Un fitu ente los trabayos de Soncai System, a finales de los 2000 y l’actualidá, qu’abrió puertes a soníos nuevos que dempués siguieron trabayando otres xeneraciones.

¿Cuála pienses que ye la so mayor aportación a la escena musical asturiana?

L’apertura a xéneros nuevos. Falo de reguetón, cumbia y salsa electrónica, beats de hiphop, pop electrónicu, ¡¡y too amestáu nel mesmu discu!! Anguaño pienso qu’esa diversidá ta más aceptada, pero va unos años nun yera tan común. De dalguna manera, veo la diversidá qu’alcontramos na escena asturiana actual, como una continuación natural d’esti discursu entamáu por Fruela.

«Llariegu supunxo l’apertura a xéneros nuevos. Falo de reguetón, cumbia y salsa electrónica, beats de hiphop, pop electrónicu… Anguaño pienso qu’esa diversidá ta más aceptada, pero va unos años nun yera tan común. Veo la diversidá qu’alcontramos na escena asturiana actual, como una continuación natural d’esti discursu entamáu por Fruela»

El discu ye tamién una reivindicación de, ente otres coses, el pop llariegu, un estilu de música mui popular n’Asturies pero munches vegaes refugao dientro de la propia escena de la música n’asturianu. ¿Qué valoración faes sobre esto?

Préstame la reflexón. Como milenial nacíu a entamos de los 90, siento que pa la mio xeneración les víes de contactu pa cola música n’asturianu yeren el rock astur o’l folk, y dambes escenes refugaben abondo tolo rellacionao col pop llariegu. Cuido qu’esti discu da nel clavu abriendo esta reflexón, y esto ye dalgo que queda nidiu nel propiu tema de ‘Llariegu’, coles pallabres de Damian Barreiro. Agora, cuando vemos a Rodrigo Cuevas collaborando con Beatriz o faciendo lo que podríemos llamar «nuevu pop llariegu» con Massiel, esta reivindicación paez muncho más evidente (¡y necesaria!), pero siempre ye bueno recordar a quienes abrieron l’alderique.

«Agora, cuando vemos a Rodrigo Cuevas collaborando con Beatriz o faciendo lo que podríemos llamar «nuevu pop llariegu» con Massiel, esta reivindicación paez muncho más evidente (¡y necesaria!), pero siempre ye bueno recordar a quienes abrieron l’alderique»

L’álbum salió en mayu de 2020, a final del confinamientu. Al poco tiempu entamasti tú y otra xente a facer música n’asturianu entemeciéndola con electrónica y otros soníos «urbanos». Tamién notros territorios surdieron munchos proyectos musicales d’esti calter. ¿Influyó l’andanciu en tou esto, foi casualidá y/o por qué crees qu’esi foi’l momentu d’esti espoxigue musical nuevu?
Cuido que sí. Nel mio casu, llevaba dalgún tiempu faciendo prebes, influyíu polo que taba faciendo xente como Baiuca o Califato. L’andanciu pa mi significó tornar a casa y volver a pasar munchu tiempu col mio hermanu y d’ehí echó a andar el proyectu.

¿Qué significó pa ti esti discu cuando salió? ¿Y agora cola perspectiva del pasu del tiempu?

Pa mi nun significó daqué concreto nel momentu que salió, porque realmente descubriríalo más tarde, cuando entamé a investigar si esistíen más proyectos paecíos a lo que yo tenía en mente faer. Foi ehí cuando di con Fruela757 y con esi trabayu. Sí que ye verdá que yá conocía’l discu de Tutu Estudiu (2007), que tamién diba un poco nesa llinia. Naquel momentu dambos fueron referencies clares, sobre manera porque m’ayudaron a ver que lo que yo tenía na tiesta podía tener xacíu y que nun partía de cero.

A día de güei yá nun los considero referentes directos porque tengo esi proyectu aparcáu, pero siguen siendo artistes qu’escucho y valoro.

¿Cuála pienses que ye la so mayor aportación a la escena musical asturiana?

Creo qu’una de les sos mayores aportaciones foi romper un poco cola idea de que la música n’asturianu tenía que sonar siempres d’una forma concreta o quedase no más tradicional. Fruela757 cueye elementos bien reconocibles, como l’asturianada, y llévalos a un terrén muncho más actual, con producciones más cercanes a lo qu’escucha la xente nuevo anguaño. Y eso ye clave, porque nun se trata namás de camudar el soníu, sinón d’a quién llegues. A la fin, consigue que xente qu’igual nunca se pararía a sentir daqué n’asturianu lo faiga porque-y entra pol estilu. Y eso abre abondo’l focu de la escena y da-y continuidá.

«Nun se trata namás de camudar el soníu, sinón d’a quién llegues. Fruela 757 consigue que xente qu’igual nunca se pararía a sentir daqué n’asturianu lo faiga porque-y entra pol estilu. Y eso abre abondo’l focu de la escena y da-y continuidá»

¿Cómo t’influyó o inflúi como intérprete?

Esi foi l’emburrión real: saber qu’había una respuesta per fuera. A partir d’ehí, lo mio foi abondo más llibre, ensin intentar paeceme a naide, pero si con esa tranquilidá de que la idea tenía xacíu.

El discu ye tamién una reivindicación de, ente otres coses, el pop llariegu, un estilu de música mui popular n’Asturies pero munches vegaes refugao dientro de la propia escena de la música n’asturianu. ¿Qué valoración faes sobre esto?

Creo que tien qu’haber opiniones variaes siempres, y nel mio casu soi bastante clara con esto: l’asturianada como tal nunca me gustó. Yo vengo de tocar la gaita y tenela bien presente en concursos y amueses, onde la mayoría de participantes yeren de tonada, y siempres foi daqué que se me faía abondo toscu o aburríu a nivel personal. Sicasí, entiendo perfectamente’l so valir y que ye una base fundamental dientro de la música asturiana. Precisamente por eso paécenme interesantes proyectos que la lleven a otros contestos, porque dexen que xente como yo, que nun conecta con esi formatu, pueda averase dende otru llugar.

«Lo de L.lercia facíalo por puru aburrimientu mientres el confinamientu y por xuntar dos coses que me gustaben, ensin más intención que probar. Ello ye que publicaríalo más por interés, por ver hasta ónde podía llegar, que con una idea real de convertilo en daqué serio»

L’álbum salió en mayu de 2020, a final del confinamientu. Al poco tiempu entamasti tú y otra xente a facer música n’asturianu entemeciéndola con electrónica y otros soníos «urbanos». Tamién notros territorios surdieron munchos proyectos musicales d’esti calter. ¿Influyó l’andanciu en tou esto, foi casualidá y/o por qué crees qu’esi foi’l momentu d’esti espoxigue musical nuevu?

Nel mio casu, el proyectu surde totalmente dende lo personal y dende’l contestu que tábamos viviendo nesi momentu. Facíalo por puru aburrimientu mientres el confinamientu y por xuntar dos coses que me gustaben, ensin más intención que probar. Ello ye que publicaríalo más por interés, por ver hasta ónde podía llegar, que con una idea real de convertilo en daqué serio.

Nunca plantegué facelo como proyectu económicu nin profesionalizalo. Ello ye qu’hubo ocasiones nes que me llamaron pa facer directos y siempre dixi que non, porque soi consciente de que técnicamente’l proyectu tenía munches faltes y preferí ser honesta con eso. Nun yera como lo que facía’l restu nin intentando encaxar en nenguna escena; a cencielles taba esperimentando. Depués, col tiempu, sí que coincidió con una tendencia más amplia, pero nel mio casu foi daqué totalmente natural, non buscáu.

¿Qué significó pa ti esti discu cuando salió? ¿Y agora cola perspectiva del pasu del tiempu?

La verdá que yo a Fruela descubrílu tarde, na mani de la oficialidá de 2021 parezme… anque sí que foi esti discu’l primeru que sentí, porque taba recién asoleyáu. La mio reacción foi fala-y per Instagram y deci-y que molaba muncho lo que facía y que si quería dir a un conciertu míu taba invitáu ajajajajaja (d’aquella cuando toqué en La Salvaje en 2021 y inda nun facía música n’ast pero taba entamando).

¿Cuála pienses que ye la so mayor aportación a la escena musical asturiana?

Pa mi nun ye namás importante a nivel Asturies sinón a nivel estatal. Entamó a facer mestures con música del país muncho enantes qu’otros productores de renome. Yo creo que ye ún de los responsables de que, güei día, trabayemos cola musica asturiana acuallá d’unes llendes afitaes.

«Pa mi Fruela 757 nun ye namás importante a nivel Asturies sinón a nivel estatal. Entamó a facer mestures con música del país muncho enantes qu’otros productores de renome y amás con unes sonoridaes mui llocales, a diferencia d’otros proyectos estatales qu’al mio paecer yeren demasiao asemeyaos a la electrónica «tribal» de Sudamérica»

¿Cómo t’influyó o inflúi como intérprete?

En cuantes entamé a sentilu quixi probar a facer un tema asina, y salió ‘mal tiempu’ un cantar qu’asoleyé en 2021 y onde pue sentise la so influencia y la de Llevólu’l Sumiciu, que tamién foi un gran descubrimientu esi añu. ¡Foi’l mio primer cantar n’ast!

El discu ye tamién una reivindicación de, ente otres coses, el pop llariegu, un estilu de música mui popular n’Asturies pero munches vegaes refugao dientro de la propia escena de la música n’asturianu. ¿Qué valoración faes sobre esto?

Paezme super importante que Fruela trabayase con eses influencies ensin prexuicios, que tovía güei tendemos a tener. Una cosa que pa mi marcó la diferencia ye qu’él taba trabayando con unes sonoridaes mui llocales, a diferencia d’otros proyectos a nivel estatal qu’al mio paecer yeren demasiao asemeyaos a la electrónica «tribal» de Sudamérica como Nicola Cruz, Chancha Via Circuito, etc…

«En cuantes entamé a sentilu quixi probar a facer un tema asina, y salió ‘mal tiempu’ el mio primer cantar n’ast, qu’asoleyé en 2021, y onde pue sentise la so influencia y la de Llevólu’l Sumiciu, que tamién foi un gran descubrimientu esi añu»

L’álbum salió en mayu de 2020, a final del confinamientu. Al poco tiempu entamasti tú y otra xente a facer música n’asturianu entemeciéndola con electrónica y otros soníos «urbanos». Tamién notros territorios surdieron munchos proyectos musicales d’esti calter. ¿Influyó l’andanciu en tou esto, foi casualidá y/o por qué crees qu’esi foi’l momentu d’esti espoxigue musical nuevu?

Por xente como Fruela decatámonos de que taba bien facer música colos referentes que mamamos tola vida y que llevábamos sintiendo dende guah.es, y eso que yo considero que llegué bastante tarde al rollu; pero de xuru influenciáu por esta xente. Lo que me sigue flipando ye que Fruela 757 yá tuviese asoleyando temes d’esti estilu dende 2008!!!! Pa mi, un visionariu que descubrí demasiao tarde.