La Oficina de Normalización Llingüística del conceyu de Xixón entama nesti mes d’ochobre’l ciclu Ente Fueyes, una iniciativa lliteraria pa esta seronda na que la música asturiana va tener presencia coles presentaciones del ensayu d’Héctor Braga y el testu teatral Flashback y el conciertu de Milfueyes -Sandra Álvarez y Noemí González-. La programación completa pue consultase equí.
L’Ochobre Lliterariu entama mañana, martes 8, nel Salón d’Actos de la Escuela de Comerciu a les 19h cola presentación de Nel cantu la memoria. Ensayu sobro l’asturianada tradicional d’Héctor Braga, Premiu Máximo Fuertes Acevedo d’ensayu nel 2023. El trabayu del multiinstrumentista y doctor en Musicoloxía asoleya les claves del pasáu, presente y futuru del xéneru, y apurre un archivu dixitalizáu, catalogáu y organizáu con cuasi 500 grabaciones históriques d’asturianada, un testu d’investigación que promete convertise n’imprescindible.
Per otru llau, Dolfo Camilo Díaz presenta Flashback el martes 15 a les 19h, tamién na Escuela de Comerciu, una comedia musical y política qu’algamó’l Premiu Pachín de Melás de testos teatrales. Milfueyes zarren les intervenciones de música asturiana’l xueves 24, amosando la so propuesta d’asturianada contemporánea y feminista nel Salón d’Actos del Centru de Cultura Antiguu Institutu a les 19h.
Suscríbite a les nuestres novedaes
