Felpeyu; desplicar qué ye Felpeyu ye daqué difícil. Quiciabes nun paga la pena facelo con pallabres, y por eso facemos una playlist. Son munches coses xuntes: l’allegría, la nostalxa, l’amor, la llucha polo propio, la folixa. Felpeyu ye’l grupu que mos enseñó a cantar a Asturies. Ye’l grupu que mos dio con qué-y cantar. Temes como ‘Tierra’, ‘Canteros’, ‘Ferreirín’, ‘La Pongueta’… Con toos ellos tenemos pa falar de los llugares, de la xente, de la llingua, pa namoranos d’ello, p’alcordanos, pa pasalo bien, pa reivindicalo.
Seis discos, Felpeyu (1994), Tierra (1997), Live Overseas (2001), Yá! (2003), Canteros (2008) y Cerquina (2017), amás d’un EP de reciente espublización (Si quies que baille contigo) conformen la discografía d’un grupu qu’algamó qu’ún de los sos cantares, Los Fayeos de Mayo, fuera consideráu como el meyor de la hestoria de la música asturiana, según una encuesta de la RPA en 2018.
Siempre col recuerdu d’Ígor y Carlos, a los que tovía siguimos sintiendo nes ayalgues que son esos discos, y d’Elías, que tamién foi miembru del grupu en dos etapes distintes, sentir a Felpeyu ye pasar per ún d’esos momentos nos que ye imposible imaxinar la cultura asturiana ensin ellos. Teníen qu’existir d’una forma u otra.
Con esta publicación continuamos la estaya de playlists nel nuestru perfil de Spotify. Inspirándonos nes This Is: que la plataforma musical sueca dedica a artistes de renome, Musicasturiana.com facemos lo propio centrándonos nos cantares de los grupos más destacaos de la música’l país. Esto ye: Dixebra, Esto ye: Llan de Cubel, Esto ye: Mariluz Cristóbal Caunedo, Esto ye: Nuberu, Esto ye: Muyeres y Esto ye: Nacho Vegas foron les anteriores incorporaciones. La escoyeta musical d’estes playlists nun respuenden namás a criterios algorítmicos o a los temes más populares de cada formación.
Suscríbite a les nuestres novedaes
