El «Gran festival de folclore asturianu» aporta a la so 35 edición y pa festexalo l’Asociación d’Intérpretes de Canción Asturiana (AICA) va enllenar el Teatru Xovellanos de cultura popular del país. Dende les 12h y con entrada llibre l‘escenariu d’esti espaciu escénicu xixonés va acoyer actuaciones d’asturianada -Álvaro F. Conde, Ismael Tomás, Lorena Corripio y Marina Carbajosa-, de pop llariegu -Vicente Díaz y Jerónimo Granda, de gaita -Vicente Prado «El Pravianu» y Iván Rionda- y los monólogos de Ludivino Díaz «Pin de la Cotolla».
Julio César Baragaño y Fernando Valle Roso van ser los presentadores d’esta xornada na que tamién va haber un actu institucional pa homenaxear a dos figures mui destacaes de la canción asturiana: Mariluz Cristóbal Caunedo y José García «Ché de Cabaños». Con esta cita, que cunta col sofitu del Ayuntamientu de Xixón, AICA sigue trabayando nel llabor qu’entamó en 1990: «l’estudiu, defensa y divulgación de la canción asturiana en xeneral».
Suscríbite a les nuestres novedaes
