N’ochobre de 2017 musicasturiana.com entamó a facer playlists dedicaes a distintos estilos y novedaes de la música’l país. Música Asturiana, Novedaes Música Asturiana, Rock n’asturianu, Folk Asturianu fueron les cuatro primeres, a les que fueron amestándose otres temátiques como la de L’Asturianu Llingua Oficial, que compila cantares en defensa de l’asturianu; Nuevo en Spotify a la que se van amestando tolos llanzamientos dixitalizaos por musicasturiana.com; les de Conexones, dedicaes a otres músiques del mundu; o, ente otres, les de La Banda Sonora De… na que distintes persones de la escena musical asturiana escueyen los 20 cantares que más-y presten. Agora’l llistáu medra con una nueva: ¡A Baillar!
Xotes, muñeires, pasodobles, dances, saltones… los sones que nun pue faltar nuna Nueche en Danza protagonicen esta llista de reproducción formada por 135 pieces y que suma más d’ocho hores de música asturiana. El llistáu ta fechu pol llector y sociu de L’Ensame de musicasturiana.com, Lluques Díaz Rozada, y esbilla los temes más populares de la música pal baille, interpretaos tanto por formaciones de música tradicional como reellaboraos por otres bandes folk.
Suscríbite a les nuestres novedaes
