Vuelve una de les cites imprescindibles de la música asturiana, el Festival Internacional de la Gaita (FIG) de Villaviciosa. Dende esti xueves 31 hasta’l domingu 3 de setiembre, l’eventu acueye una montonera d’actividaes nes qu’hai actuaciones de bandes de gaites y bandines, conciertos folk, pandereta y baille, esposiciones, talleres, mercáu, artesanía, canción asturiana y concursos. Amás nesti festival entamáu dende hai 16 ediciones pola Banda de Gaites Villaviciosa-El Gaitero toles actividaes -sacantes los talleres- son de baldre.
El xueves 31 d’agostu a les 18h na Casa de los Hevia entama’l FIG cola inauguración d’una esposición dedicada a la indumentaria tradicional asturiana. La colección ye del Grupu de Baille Tradicional San Félix y el so director, Xurde Fernández, va facer una visita guiada’l vienres 1 a les 20h. A les 20h la BG Villaviciosa-El Gaitero va desfilar peles cais de la villa pa dar pasu a les 21h al conciertu de Llau -tríu formáu por Dani Álvarez, Lisardo Prieto y Luis Nicolás-, que van actuar nel Teatru Riera.
El vienres 1 la xornada entama a les 17h cola inauguración del Mercáu Artesanu y Ecolóxicu que va tar asitiáu na Plaza Xosé Caveda y Nava. A les 18h actúa la banda anfitriona y a les 19h la Orquestina La Xarangana na carpa’l festival que ta asitiada na cai del Sol. De 19h a 21h José Manuel Tejedor imparte’l cursu Ornamentación na gaita asturiana nel Atenéu Obreru, pal que ye necesario inscribise previamente per corréu electrónicu, Amás de la mentada visita guiada a la esposición, la tradición enllena la programación d’esi día coles actuaciones na carpa’l festival de la Escuela de Folclore de Zamora (20h), de la gallega Escuela de Gaites d’Ortigueira (20.30h) y de los escolinos y profesores de la Escuela de Música Tradicional de la BG Villaviciosa-El Gaitero (21h). Pa zarrar la xornada hai Nueche en Danza na qu’actúen a les 21.30h na carpa Les Xeitines, La Xarangana y el Grupu de Baille Tradicional San Félix.
Pal sábadu 2 les actividaes entamen dende bien ceo. De 9.30h a 14h ye’l taller d’Introducción a la construcción y axuste de payueles col profesor Pelayo Fernández -tamién, baxo inscripción-, y a les doce’l mediudía desfilen les bandes de gaites Castro Bergidum (El Bierzo), Ortigueira (Galicia), Folclore de Zamora y Cuncordia a Launeddas (Cerdeña). Éstes van facer más pases y actuaciones dende les cinco la tarde acompañaes pola banda anfitriona. Amás, de 16h a 21h ye’l VI Alcuentru d’Artesanos d’Instrumentos Musicales Tradicionales na Plaza l’Españadal y tamién a les cuatro la tarde hai un taller didácticu pa la reciella qu’imparte Laura Ruiz na Plaza Xosé Caveda y Nava.
Nueche folk, bandines y tonada
Pa rematar la xornada del sábadu 2 actúen La Bandina’l Fuelle a les 20h na Plaza l’Españadal y llueu na carpa’l festival ye la Nueche Folk na que toquen les formaciones asturianes Alienda, Llan de Cubel, Deira & Borja Baragaño xunto a los escoceses Project Smok. El domingu 3 el FIG zarra la so décimosesta edición coles actuaciones -a les doce pelos chigres de la villa y a les cinco na carpa–de la Bandina’l Busgosu, La Banda d’Oscarín y la bandina de la BG Villaviciosa-El Gaitero; col IV Certame de Canción Asturiana Xavi Solares que ye a les seis na carpa y nel que participen Celestino Rozada, Águeda Riera, Manuel Roza, Néstor Díaz y Valentín Fuente a la gaita; y col XIII Concursu de Gaiteros y Gaiteres Memorail José Huerta, nel Teatru Riera a les siete la tarde.
Suscríbite a les nuestres novedaes
