Avilés, Muros del Nalón, Grau y Llanes acueyen dende’l vienres hasta’l sábadu cuatro eventos nos que la seronda y les sos tradiciones son protagonistes. Algaire, Ún de Grao, Javi Tejedor, Los Gascones, Los Llerones, Ambás ya Ramsés, l’Andecha Turcipié, Xarré, el Grupu Etnográficu L’Oriente, Alba y Sabu y la Xarangana van poner la música esti fin de selmana.
La Conceyalía de Festexos del Conceyu d’Avilés entama’l nuevu festival folk Al Son de Payares pa celebrar la seronda esti vienres 29 de payares dende les 19h na plaza’l Parche. Nél van sonar la fusión d’estilos cola tonada d’Ún de Grao Trío, les panderetes d’Algaire y los ritmos de La Güeriata DJ.
Al otru día, Muros del Nalón acueye la so 2ª Seronda y Cancios de Chigre n’alcordanza de Miguel Ángel López Aparicio «Miguelón» per dellos chigres de San Esteban. L’eventu entama a les 13.30h cola actuación de les pandereteres Clandestías xunto a Javi Tejedor. Dempués del concursu d’escanciáu de sidra, el Grupu Folklóricu Brisas de Aguilar va dar pasu al alcuentru de cancios de chigre coles bandines Los Gascones y Los Llerones.
Per otru llau, vuelve una edición de la Seronda en Danza de Grau. Esti sábadu 30 payares l’IES César Rodríguez de la villa moscona va enllenase de baille y música tradicional. A les 17,30h va haber un taller de pandereta y a les 18.30h otru de baille tradicional; too pa «nenos, nenas ya mayorinos/as». Dempués a les 20h va haber una Nueche en Danza con Ambás ya Ramsés, l’Andecha Turcipié y Xarré.
Por último, l’Asociación Cultural Llacín entama una nueva edición de la Esbilla en Llacín dende les 19.30h del sábadu. Al tiempu qu’entama la esbilla, fáenlo los cantares tradicionales. A les 20.30h va haber taller de baille tradicional y, dempués de la espicha, una Nuechi en danza a la que van poner música, dende les 22h, el Grupu L’Oriente, Alba y Sabu, y la bandina Xarangana.
Suscríbite a les nuestres novedaes
