La música y el baille tradicional vuelven a protagonizar parte de la programación cultural d’esti fin de selmana gracies a dos destacaos eventos, el Festival Folklórico Caleyando d’Avilés y el III Alcuentru Folclóricu de Siero. Axunten a un total de nueve agrupaciones de raigañu y celébrense dambos esti sábadu 14 de payares.
Ximielga la Saya organiza’l Festival Folklórico Caleyando, que tien l’oxetivu d’enllenar les cais d’Avilés de música y baille tradicional. D’esta manera, de 12.30h a 14h va haber baille na cai en Sabugo, El Quirinal, Polígono-La Magdalena y el Cascu Vieyu de la villa. Pa les 18.30h hai un pasacáis de les agrupaciones participantes dende Galiana, Rivero y La Cámara y a les siete la tarde actúen toes na Plaza’l Parche. Nesta edición, amás de la formación qu’entama l’eventu, actúen Arduriu Pixautu y el Grupo de Danzas Ribera del Pisuerga de Valladolid.
D’otra banda, el Teatru Auditoriu de La Pola Siero acueye’l III Alcuentru Folclóricu nel que participen grupos de baille y bandes de gaites del conceyu. Dende les ocho la tarde y por un preciu de 9 € (con descuentu a 6,75 € pa estudiantes y persones desemplegaes a menos de 24 años) acúten el GFI El Ventolín, les agrupaciones folclóriques Cuélebre, El Piñote y La Sidrina, el Grupu Folclóricu Principado, la bandina Camín del Carmín y la Banda Gaites Xiranda. Les entraes yá pueden mercase online.
Suscríbite a les nuestres novedaes
