Güei a les 20.15h estrénase nel Teatru Palaciu Valdés d’Avilés El Chigre Menguante, la nueva obra de teatru escrita y dirixida por Maxi Rodríguez. El músicu David Varela ye parte del repartu d’esti espectáculu de Saltantes Teatro y, amás d’actuar, pon música a la BSO con «La Rumba’l Chigre Menguante«, un cantar que s’estrena a la mesma hora que la obra na canal de YouTube de musicasturiana.com
«Cuéntase una hestoria de chigre de tantes que pasen anguaño, igual con un poco aire de rumba mui averada al estilu La Mandrágora o Kiko Veneno», desplica David Varela sobre esti tema que ta grabáu nun chigre, usando de percusión cuyares, botelles, el sartén, morteru, llata pimentón y demas cacharreríu propiu del establecimientu, amás de la voz y curdión.
Nun ye la primer vez qu’esti multiinstrumentista tien rellación col teatru: Olga Cuervo, Ana Morán, Nun Tris, Margen, Teatro del Cuervo o Factoría Norte, con quien algamó un Premiu Oh! pola BSO de Nora, la neña de sal (2013)», son dalgunes de les compañíes coles que Varela collaboró. Nesta ocasión amás de lo que define como un «caméu actoral», tamién s’encarga de la dirección musical. El Chigre Menguante ta inspirada nel llibru de Maxi Rodríguez ¿Cómo ye lo nuestro?, reflexona sobre Asturies y la so identidá y el repartu ta formáu por Luis Alija, Nerea Vázquez, Carlos Mesa, Alberto Rodríguez y el mentáu David Varela.
Suscríbite a les nuestres novedaes
