Bear, The Storyteller publica ‘L’Ermitañu que coronó les nubes’

Rafael Merina Guerra ye l’alter egu de Bear, The Storyteller; un músicu orixinariu de Jerez de la Frontera (Cádiz) que dende guah.e siempre tuvo una conexón con Asturies y qu’actualmente vive en Piloña. Tres llanzar 3 EPs ente 2015 y 2023, l’artista publica agora’l so primer llarga duración L’Ermitañu que coronó les nubes, un trabayu de música instrumental acústica influenciada pol post-rock, post-metal y neofolk onde l’asturianu ta presente nel nome del álbum y en dalgunos de los títulos de los cantares, como yá lo tuviera na so entrega anterior L’osu y la rapiega.

«Esti trabayu surde de la necesidá d’espresar la vida como un círculu de sentimientos y esperiencies (el mesmu discu ye un círculu, pues acaba onde entama); dalgunes vegaes surden d’una llúriga y pasín a pasu tenemos que salir d’ella y dir viendo lluces hasta por fin aportar a coronar les nubes», desplica Merina alrodiu’l conceptu d’esti álbum formáu por diez temes instrumentales y un cantar. Asturies ta presente como’l tresfondu de la vivencia personal d’esti autor: «Viví munches coses equí a lo llargo mio vida hasta’l puntu de tomar la decisión de venir y intentar vivir equí, colo que supón dexar el sur, collacios, familia, trabayu…».

Pal xerezanu afincáu en Piloña poner los títulos n’asturianu «ye una forma personal de da-y puxu a lo que significa Asturies» pa él. Amás destaca qu’equí «hai muncha creación y muncha proactividá, amás de sentimientu de pertenencia a esta tierra en tolos estilos de música, non namás dende’l puntu de vista tradicional y folk», que ye por onde anguaño más se mueve.

Más proyectos equí

Nesti sen, Rafael Merina desplica qu’agora mesmo ta ensayando con Nel Villanueva de Pandereteros d’Anguaño nun proyectu nuevu, L’Arna, «con toque más tradicional con gaita rabil y clarinete», amás de «deprender de referentes magníficos como Santi Galguera o Merce Santos» y collaborar con otres artistes y activistes de la zona: Irene Faza de Falando Sele, Laura Bitxo o NaySemeyes. L’exemplu de Bear, The Storyteller ye l’amuesa de cómo esti país y la so música nun tien llendes y ye fonte d’inspiración pa cualquier persona independientemente del so orixe.

2Comentarios

  • Arturo
    14/04/2024

    Ye un grande, esti Rafa!
    En tolos sentíos!

  • Patri
    26/04/2024

    Maquina!! Que suerte tenerte por Piloña y disfrutar de tu talento y trabajo. A por muchos mas exitos!

Dexa un comentariu

X