Ana Lamela publica’l discu ‘Poética d’un carbayu’

La escritora xixonesa Ana Lamela Rey ta acabante d’asoleyar un trabayu discográficu tituláu ‘Poética d’un carbayu‘, col que s’estrena como cantautora. Fírmalu embaxu’l nome de Tierra y nél recuéyense nueve cantares onde pon música a otros tantos poemes d’autores como Julia Navas Moreno, Alfredo Garay, Ángeles Carbajal, Pedro Luis Menéndez, Vanessa Gutiérrez, Marta Mori, Esperanza Medina o Armando Vega. Esti trabayu preséntase como un proyectu de difusión y fomentu de la poesía asturiana actual. Del repertoriu incluyíu nél cinco temes tán en llingua asturiana, con estilos que van de la canción d’autor al pop y hasta la ranchera o l’indie-folk. 

‘Poética d’un carbayu’ xuega cola metáfora de presentar a la poesía asturiana d’anguaño como un árbol con una foyarasca trupa na que cada cantar sería una fueya del mesmu. Acompáñase d’instrumentos como’l pianu, la guitarra (electrica y acústica), el chello, la flauta o la gaita. Ente los collaboradores destaca la cantautora, compositora y musicóloga gallega Antía Eseuve (Primas Hermanas, Casa Manuela), el productor y compositor Germán Mingote (Mingote, Tigra) o’l cantautor asturianu Chema Aladro.

Ana Lamela tien estudios de guitarra y pianu, entamando dende hai años proyectos qu’entemecen poesía y música. Formó parte del grupu Esta Noche Tampoco (finales de los 80), con unes lletres onde yá reflexaba’l so mundu poéticu, pero ye dende la creación del colectivu artístico-cultural Musa Cafeína (2012) y les publicaciones de los poemarios La Exhibicionista (2014) y La Otra (2019) cuando les sos actividaes céntrense yá dafechu na poesía, entamando alcuentros poético-musicales, festivales de poesía, talleres d’escritura creativa y proyectos musicales onde la base son los sos poemes o los d’otres y otros poetes.

Yá a la venta en musicasturiana.com