«Bele Bele» ye’l nuevu adelantu del próximu discu de Ferla Megía

Nel mes de payares ta previsto que Ferla Megía asoleye’l so EP nuevu Páxaros 01 y, tres la publicación va un mes del dembow «Xatu«, el músicu sierense ta acabante de llanzar el segundu adelantu del trabayu. Trátase de «Bele Bele«, single y videoclip qu’amuesa la cara más folki d’esti artista, a la que se-y amiesta un regggaeton, reflexando asina la so inquietú creativa.

El corte naz del baille bele bele, orixinariu de L.larón (Cangas del Narcea), pueblu bien conocío dientro del ámbitu de la música tradicional pola so riqueza cultural. «Esti tema enseñómelo una paisana de L’Entregu, Rosa», comenta Ferla, «siempre que lo tocaba y baillaba, tenía un ritmu de reggaeton na tiesta que surdía d’una forma mui natural. Decidí grabalu y densendolcalu a la mio manera» Anque’l cantar grabóse a mediaos de 2022, el xoven artista caltúvolu «na reserva» hasta da-y el formatu d’agora.

Nel single pue sentise una producción llimpia, con un únicu sample esbilláu de la canción «Dragon Eyes» d’Adrianne Lenker, una de les artistes más almiraes por Ferla y a la que-y fai un orixinal chisgu nel so videoclip. Amás, ye probablemente la pieza más folki que Megía asoleyó hasta la fecha, cola inclusión de melodíes de raigañu interpretaes cola flauta que suena gracies a la collaboración del gaiteru Diego.

Videoclip y xira

Como yá pasara con «Xatu», «Bele Bele« aporta acompañáu d’un videoclip grabáu na playa de Rodiles, aprovechando l’atapecer sele tres d’una galerna. Con un enfoque espontáneu y fechu con un teléfonu móvil, la pieza audiovisual caltién l’espíritu cercanu y auténticu que caracteriza a Ferla Megía. Amás, l’artista anuncia que nos próximos díes va dicir les primeres feches de presentación en directo del próximu EP Páxaros 01.