«Namás mos llevó 5 años facevos casu…». Con eses pallabres el tríu de folk de cámara Draque anunció que, tres de llevar dende 2021 xubiendo a escenarios, van entrar nel estudiu de grabación. Esta banda formada por trés destacaos nomes de la nueva fornada d’instrumentistes del país –Celia Corrales (voz y pandereta), Celia Nieto (vigulín) y Julio Rodríguez (bouzuki)- ta nesti momentu trabayando nes maquetes de los temes enantes d’entrar nos Tutu Estudios de Corvera pa grabar trés temes.
«Draque foi un proyectu secundariu pa los trés siempre, por distintes casualidades. Nestos años hubo bastantes persones que mos sintieron en directo, prestó-yos, y insistieron en que lo dexásemos grabao y tocásemos más«, comenta Celia Corrales. La vocalista y percusionista añade qu’esti añu van «intentar tocar más» y centrase «en madurar el repertoriu»; sicasí, esclaria que nun queríen metese «nel proyectu del discu ensin que la xente sintiera dalgún adelantu» y velos «rodar más».
D’esta manera ye como esta selmana entren nos Tutu Estudios a grabar col productor Sergio Rodríguez «un cenciellu que va asoleyase a finales de mayu previsiblemente». «D’esta grabación yá vamos salir, si sal too como queremos, con fecha pa la siguiente. Pero de momento vamos espublizar como muncho trés singles; el proyectu del discu vendrá un pocuñín más alantre, si la xente quier», matiza Corrales.
La d’esta selmana va ser la primer vegada que Draque rexistren un tema tema del so propiu repertoriu; pero nun ye’l so estrenu nos estudios de grabación. El tríu yá grabó hai un añu’l tema ‘El cabu peñes‘ pal compilatoriu Al son de cantar, un discu nel qu’artistes del too país reinterpreten un tema compuestu pol alumnáu de llingua asturiana de dellos colexos y institutos d’Asturies. Nesa pieza, estos músicos que formen parte de proyectos como Llan de Cubel, Corquiéu, Entós o La Ciudá nel Mar; yá dexaron constancia de la so finura y avancen per ónde va la sonoridá de lo que’l grupu va grabar nes próximes selmanes.
Suscríbite a les nuestres novedaes
