Mentantu rematen estos díes, nel estudiu Tutu de Corvera, baxo’l mandu del productor Sergio Rodríguez el máster de la parte musical del so trabayu nuevu, Dixebra presenten la carátula del mesmu. ‘Ente la niebla’ ye’l títulu del llibru-discu que los avilesinos tienen previstu publicar a finales de marzu; trátase d’una obra mui especial na que lleven trabayando unos dos años, cola que dan un reblagu, otru más, na so carrera llarga y granible. Esta entrega nueva del so llabor tien un calter conceptual y multidisciplinar, xirando alrededor de la historia de les clases populares asturianes. Nesti sen, los venti cortes que faen parte d’ella traten fechos o socedíos que marcaron el devenir de los asturianos y asturianes nes últimes décades.

La portada del llibru ye un bon exemplu de la obra del fotógrafu xixonés Constantino Suárez (1899 – 1983), que cola so cámara retrató la vida cotidiana xixonesa y asturiana ente 1920 y 1937. Comprometíu cola causa republicana, el so trabayu na guerra civil asístialu ente los reporteros más destacaos del sieglu pasáu y constitúi un tesoru documental col que caltener viva la memoria colectiva d’Asturies naquel momentu trascendental de la nuestra historia. Na semeya de la portada apaecen dellos milicianos, nun momentu de descansu, xunto a un gramófonu nel que tán sintiendo los característicos discos de pizarra de la dómina; una fotografía qu’espresa perbién l’espíritu de ‘Ente la niebla’ y que reflexa cómo la música acompañó al pueblu asturianu  naquel tiempu duru y cruel, pero nel que’había tamién espaciu pa l’allegría y la esperanza. La contraportada incide tamién nello mesmo, con otra fotografía de Constantino Suárez na qu’apaez un miliciamu tocando l’acordión nes posiciones republicanes del barriu de Ventanielles , nel sector uviedín de Llugones, en 1937.

Nel llibru va tener la parte gáfica, especialmente les fotografíes, una importancia bultable, complementando tanto los testos como los cantares. Nella inclúinse obres (un total de 54 imáxenes) de bien de fotoperiodístes y reporteros gráficos asturianos de distíntes époques, que col so facer dexaron constancia visual de dellos de los momentos cruciales de la historia recien de les clases populares del país.

Comprar discos de Dixebra na tienda online