Baxel, el proyectu nuevu de Rigu y Paul de Corquiéu, llanza esti domingu’l so primer discu ‘El Cantar del Simpatías’

Esti domingu va asoleyar ún de los trabayos discográficos más esperaos del añu. Trátase de ‘El Cantar del Simpatías’, el primer discu que’l guitarrista, bouzuquista y cantante Paul Balmori y el flautista y gaiteru Rigu Suárez -dambos miembros de Corquiéu-, publiquen baxo’l so nuevu proyectu musical: Baxel.

«Ye un discu que pretende rescatar y caltener vivu’l repertoriu tradicional de Ribeseya y la memoria de los sos informantes», comenta Rigu Suárez pa musicasturiana.com sobre los diez temes que dan forma al CD. Nesti sen, el músicu añade que «el repertoriu d’esti trabayu ta formáu nun 80% por temes tradicionales de Ribeseya, na so mayoría inéditos d’archivos propios y d’otros del ATOAM d’Ambás y Ramses, anque tamién aportaron archivos de collacios de Ribeseya».

La diversidá ye otra de les característiques del álbum. Suárez destaca que nel CD «hai munches Xiraldilles, baille mui propiu del conceyu, de calter y temática marinera» , amás de dances, xotes, alboraes, ramos, xotes, o aires, ente otros xéneros. Tamién hai espaciu pa melodíes propies y incluso pa la reinterpretación de partitures del sieglu XX: «Ficimos una recopilación de Xiraldilles del Cancioneru Torner que grabamos cuasi ensin modificar y rescatamos una partitura de 1915 del cupletista Juan Martínez Abades dedicada a la Marquesa d’Argüelles», añade’l flautista y gaiteru.

“El Cantar del Simpatías” va asoleyar esti domingu 31 en toles plataformes dixitales y un día enantes va vendese en CD y presentase en directo na Casa la Cultura de Ribeseya, anque con un aforu llimitáu a les 100 persones que tienen invitación pal eventu. Sicasí, Rigu Suárez esclaria que Baxel va pisar más escenarios, tanto na so «máxima espresión» cola participación de los collaboradores que tán nel discu –Xosé Antón “Ambás”, Pepín de Muñalén, David Varela, Richar García, Josep María Ribelles y Sergio Rodríguez-, como «nun formatu más reduciu». «Lo bono foi que quedaron otros munchos temes mediu fechos colo cual creo que podremos dir grabando más coses progresivamente», matiza Suárez sobre’l futuru de Baxel.

El futuru de Corquiéu

«El nacimientu de Baxel nun afecta negativamente a Corquiéu n’absolutu, al contrariu, el grupu ta mui motiváu cola salida del nuestru discu», sorraya’l flautista y gaiteru. Amás, adelanta que «la intención de Corquiéu ye volver con fuerza». «El próximu mes retomamos los ensayos, tenemos 13 temes preparaos y de xuru faedremos más. Ye verdá que nun coyemos actuaciones porque vamos volver a los escenarios namás con discu nuevu, pero nun hai nin priesa nin feches d’entrar a grabar. La idea ye facer les coses lo meyor que podamos y siguir unos añinos más».

Comprar discos de Corquiéu na tienda online