El 22 d’abril asoleya ‘Ente la niebla’ de Dixebra y yá se pue mercar en preventa
Yá hai fecha oficial de llanzamientu. El 22 d’abril va asoleyar ‘Ente la niebla‘, l’esperáu llibru-CD nuevu de Dixebra. El trabayu yá pue acutase na n’esclusiva en musicasturiana.com pa que quien lu merque lu reciba na so dirección el mesmu día del llanzamientu. Amás, mentanto dure la preventa hai merchandising del grupu a preciu rebaxáu y tolos pidíos van llevar de regalu una postal con testu manuscritu y firmada colectivamente pol grupu.
‘Ente la niebla’, va ser la obra más ambiciosa y personal de Dixebra, un trabayu conceptual alredor de la historia, la llucha y la significación del movimientu obreru y les clases populares asturianes. Nesti llibru-CD ¡collaboren periodistes, escritores, profesores, historiadores, ilustradores, dibuxantes… que, coles sos creaciones, reflexonen sobre’l pasáu, el presente y el futuru de la clas obrera asturiana. Según la banda: «la evolución histórica de les clases populares y trabayadores d’esti país son parte fundamental de la nuestra idiosincrasia como pueblu y una seña d’identidá con una potencia como poques». Con esti filu conductor preséntase un conxuntu de venti cantares -ordenaos cronolóxicamente- que traten de la llucha obrera, la resistencia antifascista, la represión franquista, l’exiliu, los fugaos, la emigración o les movilizaciones populares.
Pa contestualizar y entender meyor qué significaron toes estes cuestiones cuéntase coles aportaciones de Rubén Vega, Pablo Texón, Marta Mori, Rafa R. Valdés, Irene Faza, Faustino Zapico, Miguel Solís, Penélope Miranda o Alfonso Zapico, ente otros. Amás, el llibru va abrise con un testu de Primi Abella (guitarrista) onde fala de cómo foi’l procesu de creación de los cantares y de les temátiques concretes de caún, y va zarrase con otru de Xune Elipe (cantante) sobre la rellación de la música y les lluches de les clases populares asturianes a lo llargo de la historia.
Nel terrén musical, el discu ta formáu por venti cantares nos que van dexase sentir composiciones d’aire distintu ente sí: rock, reggae, ska, folk, funk, metal… nuna bayura de soníos que sigue la filosofía musical dixebriega.
