La nueche del 3 d’abril de 1983 desapaecía una figura trescendental nel orixe de la música asturiana contemporánea: Alberto Martínez Berciano, conocíu artísticamente como Berto Turulla. Aquella xornada llaceriosa, esti músicu xixonés pioneru nes nueves formes d’entender l’asturianidá sonora, recibía una descarga eléctrica nuna actuación entamada nuna espicha-baille en Llaniu (Salas) que nun tenía les más mínimes midíes de seguridá.
Yera de formación autodidacta como teclista, él mesmu dicía que tocaba «col descaru del que deprendió solu», con diecinieve años escomienza a acompañar a dellos de los integrantes del Nuevu Canciu Astur y participa nel primer discu de Carlos Rubiera, un single grabáu nun llagar de Caldones (Xixón) o del Lp Esparabanes de Xulio Ramos. En 1977 funda una de les formaciones más orixinales y rompedores de la música d’espresión asturiana, La Turulla. Con un enfotu innovador, actualizaron el patrimoniu musical del país, con un conceptu y unes formes desconocíes hasta entós, incorporando les nueves tecnoloxíes que taben apaeciendo daquella. Na so propuesta rescamplaba la utilización del minimoog, un instrumentu electrónicu (sintetizador) diseñáu unos años enantes pol inventor norteamericanu Bob Moog.
«Con La Turrulla actualizól patrimoniu musical del país, con un conceptu y unes formes desconocíes hasta entós y con Cuélebre faedría un pop fondamente asturianu»
L’estilu de La Turulla adscribióse al prog-rock, na estaya del conocíu como ‘rock con raigaños‘, que naquellos díes contaba con bien de formaciones y siguidores en tol Estáu. Les sos composiciones ufiertaben desarrollos llargos y con influencies jazzeres, sicasí, la música tradicional yera una de les sos inspiraciones principales. Nun dexaríen grabao más que dalguna grabación casera fecha nel local d’ensayu o en dalgún conciertu (como la I Andecha Musical de 1978).
Depués de que La Turulla se desfixere, entró a facer parte del grupu Cuélebre, col que fadría un pop asequible al gran públicu pero fondamente asturianu. Con ellos diba grabar el primer discu, Made in Asturies, que tuvo bien de repercusión nos medios de comunicación y nel que diba incluíu’l tema col que más sonadía algamaron, «Tecno-Pericote», del que Berto yera l’autor. Precisamente con Cuélebre diba sufrir l’accidente que-y costó la vida y que dexaría a la música asturiana ensin el que taba llamáu a ser ún de los sos principales pegollos.
