Grabación audiovisual inédita del primer discu del Nuevu Canciu

El xixonés Carlos Rubiera grabó en 1975 dos cantares que se publicaríen, col apoyu de Conceyu Bable, nun single que se convirtió nel primer trabayu discográficu del movimientu que conocemos como Nuevu Canciu Astur. Dende l’AMCA ufrimos una pieza audiovisual esclusiva y inédita que rexistra la grabación d’aquel cenciellu y nel que rescampla la presencia d’otros cantantes d’esti movimientu.

En 1973, un editorial de la revista Asturias Semanal (publicación alredor de la que s’axuntaba la oposición asturiana al réxime franquista) falaba del «colonialismu interior» aplicáu al nuestru país, un conceptu que fai referencia a les rellaciones económiques y culturales que se dan dientro d’un mesmu estáu.  Un añu más tarde, nesa mesma revista, asoleyábase per primer vez una sección titulada Conceyu Bable que daba orixe al nacimientu del asturianismu modernu, nel que la revinidicación llingüística yera una de les exes fundamentales. Cola muerte del dictador en 1975 ábrese un periodu nuevu dafechu y aquella collaboración periodística conviértese nuna asociación cultural que s’organiza y esparde per munchos llugares de la xeografía asturiana.

Afalaes por Conceyu Bable surdieron bien d’iniciatives que naguaben por recuperar o promover la cultura asturiana nel so conxuntu, abarcando estayes perdistintes: dende la consideración de l’arquitectura tradicional a la recuperación de les races autóctones, pasando pela conservación del paisaxe o d’elementos de la nuestra historia. Foi aquel tou un procesu de lo que llamaríemos reconstrucción nacional d’Asturies, que tamién tuvo la so incidencia n’aspectos como la política o, especialmente y nel casu que nos ocupa, la música. 

Nesti sen, dos fechos relevantes diben producise unos años enantes, ún ye la reedición pol Instituto de Estudios Asturianos (IDEA) en 1971 del Cancionero Musical de la Lírica Popular Asturiana -editáu orixinalmente en 1920-, d’Eduardo Martínez Torner; l’otru ye la publicación en 1973 del discu tituláu Verde de Víctor Manuel, nel que reellabora un conxuntu de pieces tradicionales asturianes que supón l’actualización d’un repertoriu hasta entós nunca tratáu musicalmente d’aquella manera. Nesti contestu social y musical entámase nel Pueblu d’Asturies en Xixón, en 1975, cuatro xornaes dedicaes a la Nueva Canción Asturiana, nes que participaron intérpretes mui estremaos ente sí. Sicasí, aquello foi l’aniciu d’un movimientu que diba conocese como Nuevu Canciu Astur, del qu’un de los sos ideólogos principales yera’l xixonés Carlos Rubiera. Miembru de Conceyu Bable, tenía clara la finalidá y el porqué d’una escena como la que se pretendía estructurar y echar a andar. Yá de bien mozu tenía compuestu dalgún cantar en llingua asturiana, xera que diría complementando col estudiu del Cancionero de Torner; foi asina armando un repertoriu onde estes dos facetes taben presentes.

Daquella, Asturies, nun contaba con prácticamente infraestructura musical, conque’l desarrollu del trabayu d’aquellos pioneros de la canción contemporánea nel nuestru país tenía un plus de dificultá que nun se daba n’otros territorios del Estáu. Ente les carencies más destacables taba la d’un estudiu de grabación nel que poder rexistrar les sos composiciones, teniendo que dir a los asitiaos en Madrid pa poder facelo, lo qu’encarecía abondo’l productu o, cenciellamente, imposibilitábalu. Por cuenta d’ello, Rubiera y los sos músicos (instrumentistes que davezu collaboraben colos integrantes del Nuevu Canciu) inxeniaron una solución bien llamativa pa poder grabar dalgún cantar. A lo llargo d’un fin de selmana «enzarráronse» nun llagar de Caldones (Xixón), previamente acondicionáu como estudiu de grabación improvisáu nel que la madera y la piedra aportaríen les condiciones acústiques más afayadices posibles. Ellí diben rexistrar dos temes que representaben les llinies de trabayu de Rubiera: «Aquella palombina» -basáu nuna de les pieces recoyíes nel Cancionero de Torner- y la composición propia titulada «Les campanes nel alba». Acabaríen publicándose, col apoyu de Conceyu Bable, nun single -incluyendo un pequeñu cartafueyu- que diba convertise nel primer discu d’aquel movimientu que-y dio voz a Asturies nel tiempu de la llamada Transición.

El documentu qu’asoleyamos nel AMCA ye una grabación esclusiva y inédita fecha mientres aquellos díes en Caldones pol fotógrafu del llugar Javier Canteli; les imáxenes (ensin audio) tomóles con una cámara Super-8 y foron posteriormente dixitalizaes. Nelles pueden vese distintos momentos del procesu de xestación del discu y de los aparatos emplegaos, asina como otros de descansu; rescampla tamién la presencia d’otros cantantes del Nuevu Canciu como Xulio Ramos o Manolín, El Nietu Celo Xuan, amás del escritor y entamador de C.B. Xuan Xosé Sánchez Vicente.