Del 19 al 27 de xunetu, Avilés va convertise na capital folk d’Asturies con una nueva edición del Festival Intercélticu d’Avilés y Comerca, eventu que lleva dende 1997 puxando polos sones del Arcu Atlánticu nesti conceyu y la so redolada. Amás de les feches, la organización ta acabante d’avanzar parte d’una programación qu’amesta actuaciones d’artistes y d’agrupaciones tradicionales de dientro y fuera d’Asturies.
Los conciertos yá confirmaos son los d’Herbamora, Héctor Braga -estos dos, pa presentar los sos disco nuevos, 286 Llunes y Rabil– y Orquesta Céltica Asturiana, amás de la Bandina Turcipié y el dúu formáu por Ambás ya Ramsés. Tamién va tocar el veteranu grupu irlandés de folk Altan. Per otru llau, les agrupaciones asturianes de música tradicional que yá tán confirmaes son la Banda Gaites Esbardu, Banda Gaites La Tarabica, Grupu Baille Tradicional Esbardu, Grupu de Danza d’Arcos Esbardu, Banda Gaites Picos d’Europa y les l.lenices Banda Gaites Güestia y Grupu de Baille Xanzaina.
Entá nun se conoz distribución de les actuaciones por díes nin más programación pero, como ye vezu, el FIA axuntará esposiciones, mercáu celta, talleres, atracciones pa la reciella, pasucais, recreación histórica, gastronomía, llucha celta, baille, desfiles y más actuaciones d’agrupaciones qu’aporten dende dellos países celtes.
Suscríbite a les nuestres novedaes
