Pasín a pasu dellos de los festivales asturianos van anunciando les feches de la so edición pa esti añu 2026. El Válgame Fest de Cabrales ta acabante d’avanzar a traviés de les sos redes sociales que la V edición va ser del 2 al 10 de mayu y que nella va haber el 2 de mayu charres, esposiciones y «dalguna cosuca más p’abrir boca y comenzar a calentar l’ambiente»; Nueche en Danza pal vienres 8; y conciertos, mercáu, xuegos tradicionales y otres actividaes pal sábadu 9 de mayu. L’eventu va zarrase’l domingu 10 de mayu cola «gran paellada» na que va haber música y xinta «pa rematar el festi como se merez».
El Válgame Fest ye un festival gratuitu que dende’l 2022 entama’l Grupu Folclóricu Corri-Corri de Cabrales col sofitu del Conceyu Cabrales y la Conseyería de Cultura, Política Llingüística y Deporte. La música’l país ye la protagonista d’un eventu pel que pasaron dellos de los nomes más destacaos del folk y el rock asturianu: Dixebra, Xuacu Amieva, Llan de Cubel, José Manuel Tejedor, Skontra, Skama la Rede, Felpeyu, Algaire, La Tarrancha, Skama la Rede, Guieldu… amás de delles bandines tradicionales.
Suscríbite a les nuestres novedaes
