Güei a les 20h entama en Mieres la Folixa na Primavera, con una programación musical que confirma’l so compromisu cola tradición y l’apertura a les corrientes del folk internacional. Dende’l vienres 17 hasta’l domingu 19, el Parque Xovellanos y otros espacios del conceyu van convertise nel espaciu d’una celebración onde la música y la sidra van ser protagonistes absolutes.
A les ocho la tarde Mercedes Villa, directora de la Escuela de Música de Mieres, va dar el pregón y llueu ye l’actu d’entrega del Gallardón Fini Suárez, que va concedese al mayestru gaiteru Pedro Pangua. Llueu, a les 21h ye L’Entamu, un primer bloque musical nel que los grupos de folclor del conceyu van tener un protagonismu destacáu. Van actuar GB Ruxidera, Prau Llerón, L’Artusu y la Banda Gaites Villa de Mieres, nun arranque coral que pon en valor el trabayu de base y la tresmisión xeneracional de la música tradicional. La gaita, la percusión y el repertoriu popular van sonar como carta de presentación d’una Folixa que sigue fiel al so espíritu.
La nueche va ganar pesu cola llegada de Llan de Cubel, ún de los nomes imprescindibles del folk asturianu. El grupu, con una trayectoria fonda, va volver a Mieres dende les 23h, convirtiéndose nun de los grandes atractivos del cartelú. Tres d’ellos, va ser el turnu de Xosé Lois Romero & Aliboria, que van treslladar al públicu una propuesta intensa y colectiva, onde la tradición gallega s’espresa al traviés de la voz, la percusión y la dimensión ritual del espectáculu. Va ser a partir de les doce y media de la nueche.
El sábadu 18, la programación va espardese a lo llargo del día con actividaes pa tolos públicos. Hai un taller Sones y percusión pa la reciella a les 12.30h y les formaciones Prau Llerón, BG Ruxidera, L’Artusu y la Banda Gaites Villa de Mieres van volver ocupar les cais de Mieres con un pasucais dende les 13 hores y un taller de baille asturianu a les 18h, xusto enantes de dar pasu a la tarde en danza, que van protagonizar, dende les 20:00 hores la Bandina Los Collaínos y Soi Panderetera.
A lo último, unu de los momentos más señalaos del sábadu va ser la actuación de Dervish, una de les bandes más importantes del folk irlandés contemporaneu. La so presencia suma prestixu internacional al eventu, al empar que refuerza esa conexón natural ente les cultures atlántiques. La programación acompáñase de l’actuación de Nando Agüeros, asina como toles actividaes alredor de la cultura sidrera, nuna de les fiestes más importantes del conceyu de Mieres que remata’l domingu a les 12.30h con tonada y gaita na plaza Requexu y Jerónimo Ibrán, con un pasucais de la Banda de Música de Mieres y con una pinchada de DJ La Güeriata na plaza La Pasera a les 13.30h.
Suscríbite a les nuestres novedaes
