Entreveráu ye un grupu que fai de la música un espaciu de alcuentru ente soníos, raigaños y formes distintes d’entender la tradición. Con una propuesta que mira al patrimoniu musical asturianu dende una perspectiva propia, la formación sigue abriendo caminos pa caltener viva la música d’equí y llevala a nuevos públicos. Falamos con Entreveráu pa conocer meyor la so trayectoria, les idees que tán detrás del proyectu y la manera na que entienden la música tradicional na actualidá.
Entreveráu ye un tríu que toca música de diferentes estilos: folk, klezmer, música tradicional de diferentes zones, y por supuestu d’Asturies, formáu por vigulín (Irene), guitarra ( Pelayo) y violonchelu (Aníbal).
Llevábamos casi diez años compartendo la nuestra música en Folkonexion, un cursu de música folk que se celebra n’Asturies mientres la segunda selmana d’agostu y qu’axunta a músicos de tou tipu d’estilos con ganes d’aprender y compartir. Folkonexion foi clave na nuestra historia, non solo porque ellí conocimos y fuimos compartiendo esperiencies musicales, sinón porque nos dexó descubrir afinidaes, ampliar los nuestros horizontes y desenvolver una manera común d’entender la música.
Col pasu de los años, cada vez sentíamos más la necesidá de xuntanos fuera del cursu, compartir más tiempu y siguir creando y interpretando dalgunes de los cantares que díbamos descubriendo. Asina, nel 2025 decidimos poner nome a aquello que llevábamos tanto tiempu construyendo xuntos: Entreveráu.
Queríamos espresar dos coses: d’una banda, que caún de nós vien d’una zona diferente (Pelayo de Xixón, Aníbal de Mieres, y Irene de Madrid) y, especialmente, que queríamos entemecer diferentes estilos musicales. Pa nós ye importante esa fusión porque ye lo que fai que disfrutemos el descubrir nueves cultures y soníos.
«La música tradicional asturiana ta presente nel nuestru proyectu, sobre manera, na sonoridá de los instrumentos tradicionales y el calter tan particular de la nuestra música»
La música qu’interpretamos nun se define d’una sola manera yá que tien influencies de diversos grupos y músiques. Natalie Haas, Chuchi Cuadráu, Quico Pugés, Gilles Apap, Alasdair Fraser, Galen Fraser, María San Miguel, Rubén Bada, son dalgunos de los nomes detrás d’aquello no que nos basamos.
La música tradicional asturiana ta presente nel nuestru proyectu, sobre manera, na sonoridá de los instrumentos tradicionales y el calter tan particular de la nuestra música.
A partir d’ehí, gústanos xugar colos llinguaxes d’otres tradiciones musicales, como’l country, el bluegrass, el fiddle o’l klezmer. Dacuando, la influencia asturiana ta más presente na melodía o nel ritmu, y otres apaez de forma más sutil, nos adornos, el fraséu o la interpretación.
Por supuestu. Felpeyu, Llan de Cubel, Dallahan, Vallarna, San Miguel Fraser, Vegetal Jam, Muyayos de Raíz o Kroke, ente otros.
«Gústanos pensar que nun hai contradicción ente tener raigaños y mirar p’hacia fuera. Al contrario, conocer y sentir d’ónde vienes permítete aldericar con otres tradiciones ensin perder la to propia personalidá»
Pa nós, tocar y crear música n’Asturies tien muncha importancia, porque ye’l llugar dende’l que miramos y entendemos la música. Equí hai una tradición musical mui rica, pero tamién una gran conexón con otres cultures y maneres d’entender la música folk. Gústanos pensar que nun hai contradicción ente tener raigaños y mirar p’hacia fuera. Al contrario, conocer y sentir d’ónde vienes permítete aldericar con otres tradiciones ensin perder la to propia personalidá. Por eso, crear música n’Asturies significa pa nós partir d’un llugar concretu, con tola so riqueza cultural, pero ensin ponenos llendes a la d’esperimentar.
Ún de los mayores retos al empezar ye atopar oportunidaes y espacios onde poder tocar, amosar la nuestra propuesta y que’l públicu tenga la oportunidá de conocenos. Tenemos munches ganes de compartir lo que facemos, pero sabemos que facese un güecu lleva tiempu, constancia y atopar a les persones y los escenarios afayadizos.
«Esmoleznos que la xente mozo tenga cada vez más difícil atopar espacios y oportunidaes pa desenvolver les sos esmoliciones culturales y creatives, y que dacuando esista una cierta desconexón cola tradición y la cultura propia»
Anque l’estilu de música que facemos non siempre conecta de forma directa colos gustos mayoritarios de la xente mozo, creemos que ye importante averalo a les nueves xeneraciones. Pa eso, tamos trabayando nes redes sociales como una forma de dar a conocer la nuestra propuesta y llegar a nuevos públicos. Amás, tamos preparando una ufierta de conciertos dirixida a centros educativos y espacios públicos, cola idea de que la xente mozo pueda descubrir la nuestra música en directo.
Esmoleznos que la xente mozo tenga cada vez más difícil atopar espacios y oportunidaes pa desenvolver les sos esmoliciones culturales y creatives, y que dacuando esista una cierta desconexón cola tradición y la cultura propia. Creemos qu’escuchalos y entender la so realidá ye fundamental p’avera-yos la nuestra música, xenerar nuevos puntos d’alcuentru y demostrar que la cultura asturiana tamién pue formar parte del so presente y del so futuru.
Prestaríanos que dedicase a la música n’Asturies fuera una posibilidá más accesible, con mayor sofitu y visibilidá pa los proyectos qu’empiecen, porque hai munchu talentu y creatividá que merez la oportunidá de crecer ensin tener que colar fuera.
Suscríbite a les nuestres novedaes
