La Banda Sonora de Natalia González
Podría dicise que Natalia González ye la gaitera más punkie d’Asturies. Lleva tocando esti instrumentu dende los 13 años dientro de la Banda de Gaites El Naranco y, unos años más tarde, tres medrar sintiendo a Dixebra y a Avientu -grupu del que so pá foi’l primer gaiteru-, formó’l grupu punk Ochobre xunto a otra xente bien mozo. Ye parte del presente y futuru de la escena de rock n’asturianu.
Con ella siguimos cola estaya “La Banda Sonora De…“, una serie d’entrevistes de personalidá acompañaes d’una playlist de Spotify na que cada persona entrevistada escueye los 20 cantares que más-y presten.
Sienti la playlist La Banda Sonora de Natalia González
Un discu qu’enxamás canses de sentir.
Escucho coses mui estremaes y voi cambiando d’estilu de temporada en temporada. Pero volver dacuando a «Llunáticos» (Tejedor, 2003) siempres ye volver a l’orixe de tolo que soi.
Si tuvieres que formar parte d’otru proyectu musical, ¿cuál sería?
Tanto Ochobre como la Banda Gaites El Naranco, de la que formo parte, ofrécenme tolo que necesito como componente d’un grupu: bon rollu, compañerismu, pasión polo que se fai y ganes de deprender y pasalo bien. Nun concibo la música de manera profesional, nin podría tar nun llau nel qu’a día de güei s’esperare eso de mí, pero ye dalgo mui importante na mio vida y entiéndolo namás n’armonía con tolo anterior. Subiríame a cualquier otru barcu (punkie, folkie, tradi…), si’l tiempu me lo permitiera, y tuviera eses característiques.
De los cantares que compusisti o interpretes, ¿cuál ye’l to preferíu?
«Ente los sos brazos»
«Promovería l’actividá cultural tamién nel mundu rural: n’oriente, centru y occidente. Nos pueblos queremos carreteres, infraestructures, internet, guarderíes, colexos, médicos y sí, tamién cultura»
¿Cuándo foi la primer vez que xubisti a un escenariu y que pasó enantes, durante y depués?
Entamé a tocar en bandes de gaites con trece años. Sicasí, la primer vegada que xubí a un escenariu nun contestu distintu foi nel 2014. Xuntábase Avientu, grupu del que mio pá formara parte nos 90, polos venti años del so entamu. Cola Sir Lauren’s hasta los topes y dalgunos de los grupos más representativos de rock n’asturianu nel escenariu, tuvi la oportunidá d’estrename como gaitera punk, d’aquella con un proyeutu que llueu desembocaría no que güei ye Ochobre.
¿Qué ye lo más inxusto de ser artista?
Nun me considero artista, pero vivo arrodiá d’ellos, d’artistes de toles estayes. Que davezu intenten vivir d’ello y nun pueden. Lo que considero más inxusto ye la infravaloración constante a la que se ven sometíos. La falta de consideración y de reconocimientu al so llabor.
Si fueres Conseyera de Cultura, ¿qué son les primeres coses que fadríes?
Facilitar, asegurar, garantizar medios y espacios a tou tipu de cultures y en tolos requexos d’Asturies. Pensar na especificidá del sitiu onde vivimos y promover l’actividá cultural tamién nel mundu rural: n’oriente, centru y occidente. Nos pueblos queremos carreteres, infraestructures, internet, guarderíes, colexos, médicos y sí, tamién cultura.
«Como diz la lletra de “Fríu de xineru” de Desakato, mio pá ye pa mí “un exemplu de coraxe, un espeyu onde mirame». Toi onde toi porque él me punxo una gaita nes manes. Tamién porque medré sintiendo a Dixebra»
Enantes de ser artista de la música asturiana, de xuru que sentisti o visti en directo a más compañeros y compañeres d’esta escena. ¿Quién te marcó y t’animó a xubir al barcu de facer música n’asturianu?
Como diz la lletra de «Fríu de xineru» de Desakato, mio pá ye pa mí «un exemplu de coraxe, un espeyu onde mirame». Toi onde toi porque él me punxo una gaita nes manes. Pero tamién porque medré sintiendo a Dixebra y nes sos lletres reconocí les coses qu’a mí entamaben a moveme. Asina qu’a esti barcu xubiéronme mio pá y Dixebra.
Yá conocemos les tos recomendaciones y influencies… agora toca que te confieses: ¿cuál ye esi cantar o esi grupu qu’escuches culposamente “na intimidá”?
Nun me presta’l reguetón. Pero si-y metes una base de cumbia y bachata, yá entro un poco pel aru d’esi rollu. Entós confieso que nes mios llistes de reproducción, ente Radiocrimen y Dakidarría, dacuando apaez Grupo Beatriz.
¿A qué personaxe públicu convidaríes a un conciertu tuyu, a pasar llueu pel backstage y pa qué?
A esta entruga ayúdenme a responder los miembros d’Ochobre. Viti convidaría a Ignacio Blanco, pa que pagare una ronda. Java llamaría encantáu a Barbón, esi día adaptaríamos la lletra de «Borbón y cuenta nueva» a «Barbón y cepa nueva» y puede que faláramos con él de les midíes del ociu nocturnu. Tamién convidaríamos a Pablo Viña, pero en verdá reñiríamos por dar un conciertu terrible, por dicir backstage y soltaría dalguna colleja. Asina que na, a la fin sírvenos cualquiera al que-y apeteza quedase a recoyer l’equipu.
Yá qu’escoyisti la to “Banda Sonora Vital”, vamos rematar con una Banda Sonora Orixinal. ¿De qué llibru n’asturianu te prestaría qu’hubiere una película a la qu’amás pongas-y tú la BSO?
D’Incorrectos de David Artime. Un llibru punkie merez una BSO punkie.
Asina fala Natalia González de los cantares qu’escoyó pa la so playlist
1. Los fayeos de mayo (Felpeyu).
Esta canción, pa mí, ye Asturies. La más mítica de les mítiques, la más preciosa de les precioses.
2. Nun llores, llucha (Dixebra).
Cómo non. Llévola tatuada.
3. La ciudá del rock (Avientu).
Ye un temazu, una suerte de canción n’asturianu.
4. Renaixem (Xavi Sarrià).
Prestábame muncho Obrint Pas y anque Xavi Sarrià cambió muncho d’estilu en solitario, la so voz sigue llegándome muncho. Esti tema y la so lletra son de los mios preferíos d’él.
5. Siempre fiel (Misiva).
Encántame Misiva, tienen ún de los meyores directos d’Asturies. Y sintir «Siempre fiel» con collacies ye un regalu de la música.
6. Coses de la edá (Skama la Rede).
Podría escoyer cualquier canción de Skama la Rede, pero esta siempre me resultó divertidísima.
7. Terra (Tanxugueiras).
Bebo muncho de lo tradicional, pero nun soi nada purista. Ye maravilloso llevar los raigaños a lo nuevo, a lo distinto. Ye una mezcla qu’ayuda a caltener y al mesmu tiempu aporta riqueza. Lo que faen Tanxugueiras o Rodrigo Cuevas ye llevar lo tradi a otru nivel. Y paezme una pasada.
8. Botellas rotas (No Konforme).
Ye’l primer tema qu’asoleyaron del nuevu discu y amuesa una evolución musical increíble. Brutal.
9. La casadina (Tejedor).
Una lletra preciosa alrodiu de la realidá de les persones migrantes. Y cola voz d’Eva Tejedor, que ye d’otru mundu.
10. Tremendo combo (Ezetaerre).
Vamos poner dalgo bailongo. Rap revolucionariu dende Galiza.
11. Chip (The Real McKenzies).
Son ún de los mios referentes internacionales de punk con gaita y esta canción ye pura allegría.
12. Fueu y solombres (Desakato).
Ye una suerte tener n’Asturies a un grupazu como Desakato y, qu’en cierta midida, lleven l’asturianu tan llueñe como ellos lleguen.
13. La casa gris (Llan de Cubel).
Podría repetir lo mesmo que con «Los fayeos de mayo».
14. La vida sense tu (Obrint Pas).
Vien a ser un himnu.
15. Unidá (Skontra).
Skontra ye ún de los mios grupos preferíos de la escena asturiana y echo muncho en falta más conciertos. «Unidá» ye allegría de vivir.
16. El ferreru (La Tarrancha).
O cualquier otra. Ye difícil escoyer una canción del discu «Baillando con llokes» porque ye un discazu de la lleche.
17. Sed de sangre (La Morgue).
La voz de Raquel (y Raquel en sí) ye de lo más maravilloso qu’hai na música d’Asturies. Y escuchar l’entamu de «Sed de sangre» yá arrespiga. (Esti cantar nun ta en Spotify. Calca equí pa sentilu en YouTube)
18. Col.lao (Filanda).
Llegué varios años tarde a esta canción, pero menos mal que llegué. Ye una auténtica preciosidá.
19. L’emigrante (La Col.lá Propinde).
Esti ye ún de los grupos que más pena me dio que dexaren de tocar. Pero dexáronnos de regalu tres discos prestosísimos y cantares como esti que valen munchísimo la pena.
20. Carretera (Brutus Daughter’s).
Pongo’l colofón con un grupazu madrileñu con dalgo de raigañu asturianu, música fecha en gran parte por muyeres con un remangu increíble. «Carretera» y «Cárcel» son les mios canciones preferíes del discu «Hueso y madera».
Marcos Rguez.
Bua esta genial! Me ha encantado. Un saludo!