«Nel mio próximu discu vais topar música mui virtuosa, folk celta cola gaita rabil como filu conductor»

Héctor Braga (Llangréu, 1980) ye ún de los músicos más dinámicos del país. Como él mesmu sorraya, fizo de too: «coses más o menos tradicionales, folkies, rockeres, bandes sonores y hasta covers y canciones d’autor en castellán». Tamién ye musicólogu y intérprete d’asturianada; dos cuestiones que lu llevaron a algamar el pasáu añu el Premiu Máximo Fuertes Acevedo d’Ensayu con una obra dedicada a esti xéneru. Amás, ye multiinstrumentista, anque’l so instrumentu principal ye la gaita rabil, instrumentu que da nome al so nuevu espectáculu, Rabil, nel qu’axunta «tradición y estética anovada». Anguaño alcuéntrase trabayando nel que va ser el so octavu álbum, del que ta acabante d’asoleyar el so segundu adelantu “Valiente“.

Lleves dos selmanes que nun apares: entamasti dos preestrenos de “Valiente” y el vienres actuasti nel Campoamor nel actu de l’Academia de la Llingua Asturiana pol 45 Día de les Lletres Asturianes. ¿Un primer balance d’estes xornaes?

Mui positivu. Toi trabayando enforma pa da-y visibilidá al nuevu trabayu y los videoclips son una apuesta importante. D’otra miente, como músicu asturianu y asturianista ye un honor inmensu actuar na Selmana de les Lletres, inda más nel actu institucional de l’Academia. La oficialidá del asturianu ye una causa que fice mía yá nel institutu. Daquella llees el preámbulu de la Constitución que diz lo de protexer a los pueblos d’España nel exerciciu de les sos cultures, y tiéneslo claro. Una nación histórica tan potente como Asturies nun pue siguir somorguiada nun estatutu d’autonomía que yá yera «de tercera» fai décades. Puxar pol asturianu ye puxar por Asturies.

«Una nación histórica tan potente como Asturies nun pue siguir somorguiada nun estatutu d’autonomía que yá yera “de tercera” fai décades»

Presentes “Valiente” como un cantar mui especial porque ye la primer vez que toques el tema de la guerra n’Asturies del 36-37. Tampoco cantasti nunca a la mina. ¿Por qué nunca falasti d’estos temes tan recurrentes na música y na lliteratura asturiana?

Por circunstancies familiares. Nunca nun quixi emocionar a mio güela n’abondo, porque adorábala. Yo criéme colos mios güelos y ella morrió hai un par d’años. Yera d’una familia de fondu raigañu anarquista, con padres y tíos trabayando (y hasta viviendo, según tengo entendío) nel centru obreru «La Justicia» de La Felguera. So tíu Benjamín Arrizabalaga Antuña allegó a xefe de la CNT en Sama y fue capitán d’una compañía del Batallón 209 «Celesto». Fusiláronlu n’Uviéu el 3 de mayu de 1938. Ella emocionábase falando d’elli y nun yera tema agradable.

La mina tamién dexó una buelga gafa na familia. Amás de la silicosis que mató a mio güelu, hai otru tíu d’ella, Julio (hermanu de Benjamín) que morrió en 1949 nel Pozu María Luisa, naquel accidente que dio orixe al famosu cantar. Poro, la mina y la guerra yeren temes tan dolorosos que decidí nun tocalos hasta que’l tiempu, adulces, burbixara cuando facelo. Quiero dicir que nun estrené “Valiente” un 3 de mayu por casualidá…

Polo que dices nun ye por nun querer mirar pa cuestiones con conteníu social. Vamos, qu’Héctor Braga nun ye un artista d’esos que «nun se meten en política».

Pa metese en política nun faen falta estudios. Agora bien, pa facer el trabayu d’investigación, de comunicación cultural y de crítica social que yo desendolco fai venti años necesítense un par de carreres, un doctoráu, muncha cai y muncha más caleya. Mira, hai testos míos asoleyaos hasta nel BOE pero cuando pregono fiestes como’l Mercáu de Porrúa nun hai escenariu, megafonía nin focos. Súbome a un carru’l país, entamo a xirar el rabil y póngome a improvisar y espelleyar el añu en cursu colo qu’apruz na memoria. ¿Háilo más social, más tradicional qu’eso? Non creo.

Al mio llabor faltó-y siempres más atención mediática y publicidá, pero esi nun ye’l mio trabayu. Como artista nunca nun m’avagó degolar les foles d’actualidá nes redes sociales. A mín préstame tar cola familia, lleer, viaxar, escribir y componer. Vivo pa crear conteníos y non gasto tiempu en baldre. Perderé dalgún públicu, ganaré otru… Resistir ye vencer. Y cuando la vida m’unvía llimones, faigo un gintonic y digo «chin chin». Más nada.

Amás de la lletra, esti cantar destaca por tener la participación de Víctor Manuel, al que dempués de munchos años tenemos el placer de volver a sentir cantando n’asturianu. ¿Cómo surde esta collaboración?

Cuando compunxi “Valiente”, pensé que yera un cantar ideal pa Víctor. Va años canté con elli en dellos conciertos benéficos n’Asturies, de mano de Manuel Paz, Juan Ramón Lucas y Sandra Ibarra. Llamélu, gustó-y el tema y too fue carretera llana. Cantóla dafechu n’asturianu, tal cual yo la escribiera, y amosó-y sentimientu hasta qu’algamó una interpretación maxistral. Verdaderamente ye un artista al altor de cualisquier estilu que se proponga facer. Toi mui agradecíu pola so xenerosidá y sofitu.

«Víctor Manuel cantó “Valiente” dafechu n’asturianu, tal cual yo la escribiera, y amosó-y sentimientu hasta qu’algamó una interpretación maxistral»

Enantes de “Valiente” asoleyasti “Llobatu”, que tien la collaboración d’Hevia, otru de los pegoyos de la música contemporánea del país. ¿Va haber más collaboraciones d’esti calter nel to próximu trabayu?

Pa mín ye un privilexu que Jose Ángel grabase nel discu. Xunto con Víctor, ye otra figura irrepetible d’Asturies por tolo que fizo y lo qu’algamó cola gaita al llombu. Amás d’ellos, nel discu hai collaboraciones que diremos esmigayando a midida que s’acerque la fecha d’asoleyalu. Pero d’esi calibre, nenguna más salvo sorpresa d’última hora (rises).

«La producción del discu ye de Javier Blanco (Mägo de Oz, Söber, etc.) y albidramos asoleyalu nunos meses, cuando temos a gustu col resultáu. Nun hai priesa. Agora tamos centraos nos direutos y en visibilizar el proyeutu, que ye nuevu y mui modernu»

El primer adelantu, “Llobatu”, yera un cantar mui contundente, con toques rockeros y electrónicos. “Valiente” ye más posáu y épicu. ¿Qué vamos poder topar nesti álbum viniente y cuándo vas asoleyalu?

Vais topar música mui virtuosa, folk celta cola gaita rabil como filu conductor. Diríate qu’apaezo como’l «Hurdy Gurdy Man» del cantar de Donovan, ufriendo cantares d’amor, d’épica y mitoloxía ente vertixinoses melodíes folkies. La producción ye de Javier Blanco (Mägo de Oz, Söber, etc.) y albidramos asoleyalu nunos meses, cuando temos a gustu col resultáu. Nun hai priesa. Agora tamos centraos nos direutos y en visibilizar el proyeutu, que ye nuevu y mui modernu.

Ún de los puntos d’alcuentru de les dos pieces ye l’apueste por presentalos con videoclip. ¿Por qué esta apuesta pol audiovisual? ¿Va haber más?

Apostamos polos videoclips porque aporten más lloñe que los discos. Amás, yo sé perfectamente que ye abegoso encasillame. La mio creatividá nunca nun tuvo llendes y fice de too: coses más o menos tradicionales, folkies, rockeres, bandes sonores y hasta covers y canciones d’autor en castellán. Dos videoclips con esta calidá (roblaos por Titi Muñoz y Antonio Llaneza) son la meyor ferramienta pa llamar l’atención alredor d’esti proyectu.

Nunca nun fice crowfundings nin pedí subvenciones (sacante el triple d’asturianada Fundamentos, una xera de coleicionista nada comercial). Habrá más material si hai conciertos, si la xente merca discos y si tengo sofitu. Esti discu va ser el octavu qu’asoleye y toi mui contentu de siguir na brecha.

Nesti últimu videoclip participen dellos recreadores históricos y entidaes venceyaes a ellos. Participó hasta un descendiente d’Aida de La Fuente. ¿Pues cuntar más sobre esti procesu?

“Valiente” pensóse como una historia íntima, metanes del monte. Llamé a una collacia de va más de venti años, Fe Santoveña, y pidí-y contautos de recreadores a títulu personal. Non quería meter más de quince persones de nenguna asociación nin coses d’eses pola guerra (nunca meyor dicho) que podía danos la xestión. Ella dióme’l contautu de Félix Feito, que protagoniza’l videu, y elli mesmu xestionó tola xente qu’andecha nel videoclip col mayor precuru d’armes y vistimenta. Llueu, el Ayuntamientu de Llanes iguó montes y trincheres mientres que l’andecha de Víctor Manuel fizo espoxigar el trabayu hasta’l resultáu final, que ye espectacular y ta llegando a muncha xente. Namás en dos díes pasemos de 2000 escuches nel Spotify y 1000 visiones nel youtube.

Amás de música y videu tamién l’arte visual ta presente nestos adelantos gracies a les lletres que tas publicando en redes sociales coles ilustraciones de Víctor González. ¿Por qué esta apuesta por toes estes manifestaciones artístiques?

Porque la música, si la vistes con imáxenes de calidá y roblaes a costafecha, tien un valir añadíu pa tol que sepa aprecialo. Les semeyes de Carlos Garna, el diseñu de María Ávila y les ilustraciones de Víctor son un complementu perfeutu pal mio trabayu musical.

«En Rabil amás d’improvisar cantares enriba un carru’l país, muévome ente programaciones y pedaleres d’efectos mesmo que Steve Vai o Joe Satriani… Y toi encantáu d’andar esti nuevu llinguaxe»

El vienres pasáu pudo vese enriba l’escenariu del Campoamor un adelantu del to próximu espectáculu, Rabil. Pa quien nun pudo dir al actu de l’Academia de la Llingua Asturiana nin lo vio pela TPA. ¿Qué pues cuntar d’él y en qué próximos escenarios vamos poder velu?

Rabil ye un espectáculu de tradición y estética anovada. Va un mes ficimos un showcase na Laboral de Xixón y yá dio muncho que falar. Rabil ye, lliteralmente, manivela. La gaita de rabil asturiana ye pariente de la zanfoña, zarrabete o viola da roda d’otres cultures españoles: un instrumentu de bordones, tipu gaita, pero con un mecanismu de manivela que frota les cuerdes. N’Asturies tien la so propia tradición y Teodoro Cuesta dedicó-y unos versos nel sieglu XIX. Ye’l mio instrumentu principal.

Proyeutamos videos ya imáxenes d’intelixencia artificial sobro los temes y hai momentos onde toco como si fuera una guitarra llétrica, con tola enerxía y universalidá qu’esto supón. Esta ye una dimensión nueva na música asturiana. Les crítiques y espectatives son perbones, y esto ye nuevo pa mín. Quiero dicir qu’amás d’improvisar cantares enriba un carru’l país, muévome ente programaciones y pedaleres d’efectos mesmo que Steve Vai o Joe Satriani… Y toi encantáu d’andar esti nuevu llinguaxe.

Pa la seronda testearemos Rabil nel programa Dinamizarte y nel próximu trimestre presentámoslu a Cultura en Rede pa rodalu n’escenarios de toa triba. Llevamos tola xestión humana cola mio oficina de Movusic y tenemos ganes de movelu per tol estáu. Sicasí, l’oxetivu principal que tenemos ye algamar un management a mediu-llargu plazu porque’l productu merézlo.

Y yá p’acabar. El pasáu setiembre el gobiernu asturianu anunciaba que ganabes el premiu d’ensayu Máximo Fuertes Acevedo cola obra ‘Nel cantu la memoria. Ensayu sobro l’asturianada tradicional’. ¿Cuándo vamos poder ver publicada esta obra?

Pues agora en mayu axudiquen los contratos pa editar tolos premios. Fadré mínimes correiciones y camiento qu’habrá feches p’asoleyar. Tengo ganes d’ufrir esti ensayu, que ye científicu con un barniz lliterariu, a tola xente interesao n’asturianada. Amás axunto un QR col enllaz al mio archivu sonoru (cásique 500 audios) con temes de dominiu públicu qu’axunté con materiales dixitalizaos per toa España, Portugal, Francia, Suiza y bien de países d’Hispanoamérica. La música tradicional ye como l’amor verdaderu: multiplícase al compartise con otres persones y trátase d’eso. Axallá tolos asturianos tengan una «copia de seguridá» d’estes fontes sonores y pongamos ente toos esti patrimoniu a salvu pa les nueves xeneraciones.

1 Comment

  • Ramón
    07/05/2024

    Soy se pueblu, estudiau, y sinceramente costome mucho trabajo leer toda la entrevista. Tu crees que la gente joven de hoy sabe lo que es un carro “pais” y todo es muy interesante, pero me quedo especialmente con: Como artista nunca nun m’avagó degolar les foles d’actualidá nes redes sociales. A mín préstame tar cola familia, lleer, viaxar, escribir y componer. Vivo pa crear conteníos y non gasto tiempu en baldre. Perderé dalgún públicu, ganaré otru.
    Saludos y mucho éxito.

Dexa un comentariu

X