N’ochobre de 2024 presentóse públicamente Entós, un proyectu de folk de cámara entamáu por trés músicos virtusos: Javi Menéndez (guitarra/bouzouki), Adrián Argüelles (xiblata) y Celia Nieto (vigulín). Dempués d’asoleyar n’abril de 2025 el so primer EP y dar una montonera conciertos per dientro y fuera d’Asturies, la banda afronta’l so primer cambiu de formación: déxalo Celia Nieto y entren Gabriel Salguero a les cuerdes y Sergio Rubio a les percusiones. Falamos con Javi Menéndez pa conocer les razones y los pasos futuros del agora cuartetu folk.
¿Por qué se dio y en qué consiste esti cambiu de componentes?
Hai determinaos formatos que cuanto más los trabayes y madures, vas decatándote del potencial y la fuercia que tienen. Nel tríu diósenos el casu, yá que cada arreglu paecíanos más maduru y bono que l’anterior. Pero tamién ves les coses que podríen ser aún mayores, y que surden de les hores de carretera y de madurar la escucha del EP y de tocar. Tamién interesónos sentir al públicu, falar en grupu, sentir muncha música… llévonos a intentar da-y otra vuelta al enfoque que teníemos.
Esti cambiu tamién coincide cola salida de la compañera Celia Nieto, y que’l restu del tríu vimos como’l momentu de facelo. La idega entós ye caltener un formatu “axustáu”, de tríu a cuartetu. Ensin volvenos llocos, pero mirando facer dalgo más sólidu.
El cambiu lleva a la incorporación de Gabriel Salguero, que va aportar una parte melódica más multiinstrumental, y Sergio Rubio a les percusiones.
«Esta formación nueva amplia la parte melódica ampliando’l so espectru, xugando colos instrumentos de vientu que yá teníemos con cuerdes melodiques: vigulín, bouzuki griegu, mandolina, banjo… too ello garrando l’instrumentu que más potencie la melodía»
Amás d’un cambiu de componentes ye tamién un cambiu na instrumentación, ¿qué pues cuntar d’ello?
Con esta formación, amplia la parte melódica ampliando’l so espectru, xugando colos instrumentos de vientu que yá teníemos con cuerdes melodiques: vigulín, bouzuki griegu, mandolina, banjo… too ello garrando l’instrumentu que más potencie la melodía.
Per otru llau, yá nel EP, Luis Senén con varies percusiones y Dani Álvarez al bodhran pusieron un matiz al tríu que dio una bonísima producción, que nun podía llevase al directu en tríu. Sergio incorpora bodhran, pero tamién cunta con un set de percusión buscando un estilu similar al del EP y ampliando’l rexistru de lo usao comúnmente nel folk asturianu.
Estrenastivos el pasáu vienres nel Toma 3 de Xixón. ¿Qué tal la esperiencia?
La verdá que préstonos tocar nun espaciu tan agradecíu, cola xente tan cerca. Veníemos esti mes de tocar en Lorient, con too a lo grande y presta esi calor de cercanía. Taba hasta la bandera y víase a la xente con ganes de esfrutar, y facelo estrenando formación foi al empar un momentu mui íntimu pa nós.
«Tamos definiendo’l repertoriu que fuimos teniendo y vamos siguir trabayando con coses guapos que queden pendientes pa poner el ramu a la etapa que fina»
¿Cuáles son los próximos conciertos onde poder vevos?
Tamos teniendo unes selmanes intenses de trabayu internu, onde definiremos repertoriu que fuimos trabayando en paralelu a la formación de tríu y miraremos con detalle lo que tábemos faciendo, amás de siguir trabayando con coses guapes que queden pendientes pa poner el ramu a la etapa que fina. Naguamos por qu’a la siguiente oportunidá de venos en directo la xente vaya viendo meyor hacia onde diremos.
Suscríbite a les nuestres novedaes
