Tapia conviértese esta selmana na capital celta del occidente asturianu gracies a la XXIX edición del Festival Intercéltico d’Occidente, Fiesta d’Interés Turísticu que va enllenar esta villa de conciertos, esposiciones, mercáu, charres y talleres na Escuela Internacional de Música Folk y otres actividaes. Del 6 al 10 d’agostu la música n’asturianu va sonar con nueve actuaciones: Fitiriteres, Bandina Los Collaínos, Bandina Les Campes, Grupu de Baille Tradicional Ramón de Campoamor, Banda Gaites Camín de Fierro, Grupu de Danza Tradicional Fitoria, Picarós, Corquiéu, NosOtrestres y la formación astur-madrilana Xara.
El bayurosu programa entama’l xueves 6 a les 19h col llevantamientu de la bandera celta nel ayuntamientu y la inauguración del Mercáu Celta. A les 19.45h va inaugurase la esposición del 30 aniversariu de la Banda Gaites Villa Mieres y, a les 20.30h, l’Auditoriu de Tapia va acoyer, con un donativu de 5 euros, el conciertu de les pandereteres Fitiriteres (Asturies) y Donaire (Galicia). La xornada remata a les 23h nel Puertu de Tapia con una «verbena tradicional» al cargu de la Bandina Los Collaínos, Bandina Les Campes, Grupu de Baille Tradicional Ramón de Campoamor. Sicasí
La mañana del vienres 7 el Puertu de Tapia y les agrupaciones tradicionales van ser les protagonistes. A les 12.30h la Banda Gaites Camín de Fierro anima’l Puertu de Tapia; a les 19.30h el Grupu de Danza Tradicional Fitoria actúa nel Mercáu Celta y a les 20h Camín de Fierro faen otru pase nel cai. Los conciertos treslládense a les 22.30h a la Plaza Campogrande onde van actuar el tríu folk Picarós y la formación madrilana que tamién tien repertoriu asturianu Xara.
El sábadu 8 la música asturiana va sonar a les 22.30h na Plaza Campogrande col conciertu de la mítica banda folk Corquiéu y el domingu 9 les distintes agrupaciones tradicionales convidaes nesti XXIX FID’O van participar a les 12.15h nuna «Alborada del mar» y a les 14h na recepción municipal nel Ayuntamientu. Camín de Fierro actúa a les 20h nel Mercáu Celta y Fitoria nel Puertu de Tapia. Yá pela nueche, a les 22.30h na Plaza Campogrande les pandereteres NosOtrestres ponen el ramu a los conciertos presentando’l so primer discu El son nos cantares de boda. L’eventu zárrase’l llunes 11 a les 14.30h cola baxada de la bandera celta.
Amás de les formaciones asturianes, son delles les bandes y artistes internacionales que participen nesta 29 edición del FID’O. La Bagad Arvorizion Karnag de Bretaña, el grupu de danza gallegu Donaire, l’agrupación irlandesa The Galway School Of Irish Dancing, el bretón David Pasquet, la banda escocesa Milngavie Pipe Band, la mallorquina Xeremiers de Sóller y el grupu folk irlandés Backwest representen la conexón intercéltica nesti eventu.
Amás, el Festival Intercéltico d’Occidente vuelve a poner en marcha otru añu más la Escuela Internacional de Música Folk, una programación de charres y talleres pa que la xente interesao en delles cuestiones culturales de los países del Arcu Atlánticu puedan afondar nello. L’aula va ser itinerante, con actividaes repartíes ente la Plaza del Ayuntamientu, l’Auditoriu de Tapia y el salón de plenos del Ayuntamientu.
D’esta manera el xueves 6 a les 12h va haber un cursu de baille asturianu puesto por Ángel Ramón Herrera, en compañía del grupu de baille de l’Asociación Fraternidad; el vienres 7 a les 20.30h na Plaza del Ayuntamientu hai una conferencia d’instrumentos musicales na tradición gallega; y el sábadu 8 a les 13.15h hai un cursu de baille irlandés.
Suscríbite a les nuestres novedaes
