Tres de presentar la selmana pasada’l «festivalucu» La Pitanza, Gaiteros del Carbón siguen dando anuncia d’actividaes nueves coles que festexar los sos primeros diez años de camín. Del miércoles 1 de xunetu al vienres 3 entamen la Selmana Cultural, que va tar protagonizada por talleres venceyaos a la música tradicional de Galicia, País Vascu y Castiella. Les actividaes van desendolcase nel CIDAN de Llaviana y yá tán abiertes les inscripciones na so páxina web, pa les qu’hai poques places disponibles.
Les xornaes entamen el miércoles 1 de xunetu cola participación de Vanesa Muela, cantante, multiinstrumentista y divulgadora de la música tradicional castellana. De 17h a 19h va impartir un cursu d’instrumentos de cocina y de 19:30 a 21:30 hores va poner otru de pandereta.
El xueves 2 va tar dedicáu a la tradición gallega. L’investigador y divulgador Pablo Seoane va ufrir un cursu de baille tradicional gallegu de cinco a siete la tarde. Darréu, de 19.30h a 21.30h, va dar una charra con entrada llibre centrada na gaita gallega.
La Selmana Cultural remata’l vienres 3 de xunetu, de 18h a 19h , con un cursu de txalaparta, instrumentu tradicional vascu de percusión. Va ponelu’l músicu euskaldun Iñaki Plaza. Amás, a lo llargo de tola selmana va poder visitase nel mesmu CIDAN la esposición Equí tán… estos son dedicada a los diez años de Gaiteros del Carbón.
Con estes xornaes la banda gaites de la Cuenca’l Nalón va convertir a La Pola Llaviana nun puntu d’alcuentru ente diferentes cultures y identidaes de la península ibérica y van ser un anticipu de La Pitanza, un «festivalucu» que’l domingu 5 de xunetu va enllenar el Prau La Chalana de Llaviana de música’l país coles actuaciones de les formaciones de música tradicional Pau Santirso y María Vázquez y d’Abéu.
Suscríbite a les nuestres novedaes
