La primer edición del Curuxa Fest celébrase los díes 20 y 21 de marzu

L'eventu, que cuenta con una montonera de DJs, tien tamién dos grupos confirmaos con interés poles llingües minorizaes

Conexones

El barriu de Ciares, en Xixón, va acoyer los díes 20 y 21 de marzu la primer edición de Curuxa Fest, un weekender autoxestionáu dedicáu a la música negra y, de manera especial, a los ritmos xamaicanos. El nome del festival vien de la curuxa (Tyto alba), un animal venceyáu tradicionalmente al saber —«saber más que les curuxes»— y tamién a lo nocherniego, lo misterioso y lo comunitario na mitoloxía asturiana. Esi simbolismu encaxa cola filosofía del eventu: un espaciu d’alcuentru, esfrute y resistencia cultural. Al empar, el festival funciona como homenaxe al espíritu del Northern Soul, a los sos bailes acrobáticos y a la busca de discos raros que marcó les llargues nueches del míticu Wigan Casino.

Curuxa Fest naz de la pasión pola música en formatu analóxicu, pola filosofía failo tu mesmu y pola tresmisión d’una cultura musical que marcó bona parte del sieglu XX al ritmu del metal de vientu y del vinilu. La iniciativa ta impulsada pol Ciares Soul Club, conocíu pola so trayectoria espardiendo soníos soul y rhythm & blues na ciudá, xunto col colectivu Shake it to me! Club. Dambos comparten una visión abierta y alloñada del elitismu: crear espacios cercanos, inclusivos y con precios populares onde la música sirva tamién pa fortalecer la comunidá. El festival cuenta amás col sofitu de la entidá deportiva UC Ceares, de l’asociación vecinal Esto ye Ciares y del local Páramo Bar, reforzando la so conexón cola vida social d’esti históricu barriu obreru.

Programación del Curuxa Fest

Vienres 20 · Allnighter en Páramo Bar
La inauguración del festival va celebrase en Páramo Bar, onde DJs de distintos puntos de la península van protagonizar una sesión allnighter 100 % en vinilu, con selecciones que van dende’l ska y el rocksteady hasta’l soul o’l reggae.

Sábadu 21 · Mercaín, vermú y música mientres tol día
A mediodía, el Campo de fútbol La Cruz va convertise nun mercaín con fanzines, discos y otros materiales venceyaos a les subcultures underground. La xornada va incluyir tamién una sesión vermú en vinilu y la presentación del llibru Durkheim marca un gol, del autor Leonardo H. Pelayo.

Pela tarde y nueche, el festival treslládase a la Sala Acapulco, nel Casino de Xixón, onde va tener llugar el so momentu más potente: una nuevu allnighter con conciertos y sesiones de DJs. L’escenariu de la sala va acoyer a dos bandes destacaes dientro de los ritmos xamaicanos nel Estáu:

The Magnetophones (Zaragoza), activos dende 2008, reinterpretan clásicos del ska, el skinhead reggae, el rocksteady y el soul con un estilu propiu que definieron como reggaeloo.
Treverb (antes conocíos como Skakeo Taldea), procedentes de Lasarte-Donostia, presenten discu nuevu tres una trayectoria marcada pola so enerxía y pola conexión colos ritmos xamaicanos dende Euskadi.

A ellos van sumase distintos DJs y colectivos de tola península, que van dar selecciones esclusives en vinilu pa completar un festival pensáu pa baillar, compartir música y siguir alimentando la cultura de club dende la base. Les entraes pa la nueche na Sala Acapulco tán disponibles en Libreria Paradiso, Páramo Bar, o na web del Unión Club de Ceares.