Dende hai nun tiempu vien produciéndose na escena sonora gallega l’afitamientu d’una tendencia de calter progresivu, con bandes perinteresantes que reactualicen y reellaboren la so tradición de manera llamativa y mui orixinal. De mano, hai qu’esclariar que nun ye nada fácil definir exactamente a qué se refier el términu prog, les llendes ente’l rock progresivu, el sinfónicu o l’art rock nun son estátiques y delles veces resulten imperceptibles. Toos ellos remanecen de la influyencia de la sicodelia, siendo la banda pionera King Crimson, que col so primer discu publicáu en 1969 sentó les bases d’esti soníu, una música que tuvo’l so momentu cimeru nos años 70 hasta l’apaición del punk. Musicalmente’l rock progresivu ye innovador y busca alloñase de los formatos establecíos, coles improvisaciones y los solos virtuosos como elementos característicos, amás de los cambios rítmicos y los desarrollos llargos y complexos. Tocántenes a la fusión de prog y folk danse tamién nesi periodu, fundamentalmente n’Inglaterra, Irlanda y Escocia, y posteriormente en Bretaña, con bandes como The Incredible String Band, Mellow Candle, Loudest Whisper, Fairport Convention o Tri Yann.
En Galicia les conexones ente los soníos progresivos y el folk escomiencen a dase na década de los 80, nel contestu de la primer gran folada de la Música Celta. Asina, col enfotu d’innovar la música del país surden propuestes qu’entemecen les dos tendencies, ente elles Taranis, Alecrín o Doa. Con estos antecedentes, nos últimos años principien a surdir bandes que recueyen aquel espíritu dende una perspectiva moderna; ente toes elles formen un movimientu prog de lo más atractivo y que vuelve a poner la escena sonora gallega na vanguardia de la renovación de les músiques d’orixe tradicional o folk. Darréu presentamos los que probablemente seyan los cuatro exemplos más representativos del ethnic-prog gallegu, propuestes estremaes ente sí pero con puntos en común.
Banda encabezada pol orensán Pablo Caamiña, qu’anguaño ta afincáu en Leipzin (Alemaña); practiquen un folk escuru de cadencia progresiva, ellos mesmos denominen a la so música como forest folk, pola devoción y respetu que tienen hacia’l mundu natural. Ente les influyencies qu’acueyen rescamplen el folk gallegu de finales de los 70 y principios de los 80, l’acid folk inglés o la música clásica y barroca. Nel 2007 asoleyaben una maqueta primeriza de cuatro temes grabada con pocos medios, nun diba ser hasta’l 2010 cuando publiquen el primer trabayu de llarga duración, nel que desplieguen un soníu sele, acústicu dafechu, cola zanfoña marcando la melodía y les voces ufiertando ambientes ente la tiniebla y el misteriu. Tienen yá un bon piñu de discos nel mercáu -siempre autoeditaos-, l’últimu tituláu O vento que lambe as miñas feridas (2023), colos qu’algamaron muncha sonadía nos ambientes especializaos nestes músiques. De fechu les ediciones internacionales son dalgo avezao nellos, hasta’l puntu de que tienen bien de repercusión a nivel européu. La so querencia pola poesía gallega llevólos a musicar obres d’autores como Rosalía de Castro, Celso Emilio Ferreiro o Manuel María. El propiu Caamiña esplica asina qué ye lo que busquen cola so música: «axallá que valga pa curar y caltener el nuestru vieyu espiritu ancestral, y espertar tantes coses que duermen nes nuestres memories históriques».
En barallete, l’antigua xerga de los afiladores d’Ourense, el términu ‘guezos’ val pa designar a los rapacinos, a los neños pequeños, esti ye tamién el nome escoyíu por una formación d’esa ciudá que principió’l so caleyar musical nel añu 1999. Primero como bandina de música tradicional, pa dir tresfomándose pasín ente pasu nun grupu de calter folk, incorporando posteriormente influyencies del rock, el funk, el reggae, el pop (especialmente nel aspectu vocal) y, tamién, los soníos prog. Son una mezclienda heteroxénea y ecléctica d’estilos na que los arreglos de calter progresivu son un elementu más de tolos qu’acueyen, entemeciendo secuencies d’órganu sicodéliques, con riffs de guitarra duros y melodíes d’inspiración tradicional. D’ente’l conxuntu de discos publicaos destaquen los titulaos Oito destinos (2009) y Faíscas (2022), esti últimu incluyendo una versión gaitera del tema «Wish You Were Here» de Pink Floyd.
Sons Of Exodus ye’l proyectu lliterariu, históricu y musical del guitarrista y compositor de Rianxo Carlos Cernadas, anguaño afincáu en Londres, quien emplega la banda pa esplicar de manera llibre capítulos de la historia de Galicia, mezclando música y lliteratura. Estilísticamente podríemos definilos como metal-prog con pingarates de la tradición musical gallega. La primera de les sos entregues discográfiques, de títulu homónimu (2020), taba cantada dafechu n’ingles; temáticamente cuéntase como los gallegos llograron echar a les tropes franceses en 1809 mientres la invasión napoleócica. El segundu álbum titulábase Castrexos (2021) y narra la historia d’una tribu costera que vivía de la caza, la pesca, l’agricultura y l’intercambiu comercial colos fenicios qu’aportaben al pobláu una vez al añu; esti ye’l puntu de partida d’esti episodiu musical que xira alredor de dos personaxes, Anat y Brath, pentemedies de los que vamos conocer dellos de los ritos, tradiciones y lleendes d’aquella tierra que recibía los primeros ataques de los exércitos romanos. El tercer y últimu álbum hasta’l momentu lleva por nome Cazabruxas (2023), adientrándose nesta ocasión nel tiempu escuru y misteriosu del sieglu XII, cuando’l mundu máxicu de les meigues yera avezáu en Galicia, gobernada pol arzobispu corruptu Diego Xelmírez. Rock, metal, folk, prog, tradición… nun combináu con pasaxes contundentes a base de guitarres afilaes y gaites solemnes y momentos seles con guitarres acústiques y flautes melgueres.
¿Ye posible axuntar la sicodelía con un romance de ciegu? La respuesta tiénenla los coruñeses Moura, nos que la investigación del folclor gallegu alíase coles ellaboraciones del primer rock sicodélicu. Dexemos que seyan ellos mesmos quien nos espliquen la so filosofía sonora: «Moura somos os ecos dos cantos druídicos entoados na Idade Antiga, megalitos en visión calidoscópica, guitarras coma arpas de bardos e pés bailando arredor do lume no último acantilado do planeta. Un aquelarre de brétema psiquedélica progresiva con raigame folk e mitoloxía galaica empregando a lingua galega como voz ritual comunal que persegue o transo colectivo». Tienen publicaos dos trabayos, el primeru homónimu (2020), nel que quixeron facer un pequeñu mapa del patrimoniu inmaterial del pueblu gallegu, de los sos rituales, de les sos pantasmes… una idea conceptual y musical na qu’afonden nel so segundu, y últimu por el momentu, discu, Axexan, espreitan (2022). Música envolvente, a mediu camín ente la sicodelia, los ambientes trance y el cancioneru popular gallegu, con una bona dosis d’esperimentación.
Lo prog na música representa la complexidá sonora y la trescendentalidá temática, amás d’entender el rock como daqué más qu’un simple entretenimientu; esplicábalo afechisco Robert Fripp (fundador de King Crimson) cuando dicía: «L’impulsu empoderáu del rock underground, que se convirtió en rock progresivu, foi la creyencia de que podríamos cambiar el mundu, que mesmamente l’actu d’escuchar yera poderosu. La conexón ente’l movimientu de paz y el contra cultural, la música rock como voz d’una xeneración, como un instrumentu d’espresión política y personal, taba claro». Una filosofía qu’en Galicia dellos músicos mozos tán retomando y actualizando, incorporando elementos de la so tradición y dende’l so idioma propiu.
Suscríbite a les nuestres novedaes
