La selmana pasada’l vigulineru Dolfu R. Fernández (DRD, La Bandina’l Tombo, ¿Aú?…) participó como docente nel festival Fiddle Tunes de Port Towsend (Washington). Trátase d’un eventu que nació en 1977 y nel que, amás de les clases, hai muestres y conciertos de profesores y alumnáu, jam sessions, talleres, baille…. Esta ye la primer vegada que la xente tien clases de vigulín asturianu tolos díes, compartiendo espaciu con munches otres cultures del mundu y too ello gracies al «gran trabayu que se fai nes Xornaes de Vigulín de L’Infiestu y la repercusión que tien nos círculos de vigulineros pel mundu», como desplica’l músicu.
«Nel añu 2023 la vigulinera Sami Braman vieno hasta Piloña a conocer una migayina la tradición del vigulín n’Asturies. Echó una fin de selmana con nós tocando, deprendiendo y texendo rellaciones d’intercambiu que dan agora resultáu«, comenta Dolfu R. Fernández. Asina ye como «la música asturiana enxértase per primer vez nesti eventu tan multicultural con talleres pa deprender les maneres de facer música col vigulín o lo que llamen Band-Lab, nel que la xente deprende non namás a tocar sinón que pon interés na sociedá y la cultura na que se desendolca esta música».
El músicu sorraya qu’ente l’alumnáu «son desconocedores absolutos d’Asturies de quién somos o qué facemos pero alléguense a tí con un respetu máximu y unes ganes inmenses de comunicase y conocer«. «Vino xente de siguío pa dame les gracies por venir a amosar la cultura asturiana o pa preguntar sobre cultura, tradiciones… Infinita curiosidá». Una curiosidá tamién ye que «el xerente del Fiddle Tunes -y d’otros dos programes de música más- ye Peter McCracken que, coincidencies de la vida, ye fíu d’una asturiana«.
«El festival tien un carácter acoyedor y abiertu dafechu a descubrir la música y la cultura de les diferentes partes del mundu. El vigulín ye siempre’l centru d’interés nesti eventu con propuestes tan distintes como la música de les Isles Caimán o Galicia; amás toles tribes de música americana, dende los soníos más sureños de Texas que conecten coles tradiciones mexicanes, la música cajún de Lousiana, les músiques de los apalaches de sitios como Alabama, Tennessee o Carolina del Norte, l’estilu de la costa este americana y los emigrantes irlandeses y escoceses, o la música old-time…», comenta Dolfu R. Fernández.
Nesti sen, Fiddle Tunes preséntase como un festival «d’inmersión dafechu d’una selmana de duración qu’ufre la oportunidá de conectar colos portadores de les tradiciones del vigulín». El so métodu d’enseñanza ye «el de la tradición oral: observación minuciosa y esperimentación personal» y xunto a les clases hai munches otres actividaes nes que, amás del protagonismu del vigulín. hai espaciu tamién pa banjos, guitarres, mandolina, curdión, contrabaxu y baille.
El pasáu vienres 4 de xunetu’l Fiddle Tunes remató col conciertu que fizo l’alumnáu «enseñando les coses que fueron practicando los otros díes», amás d’unos conciertos de profesores. La iniciativa ta xestionada pola Fundación Centrum y el músicu asturianu valora que «lleven un par d’añinos con un proyeutu p’adolescentes cola idea de facer cantera y van mui bien; esti añu tienen casi un cientu adolescentes tocando y deprendiendo«. Amás diz que ye «un garrapiellu de mozos y moces -The Onlies-, quien coordina la música y los profesores que van participar nel festival».
La esperiencia del Fiddle Tunes ye una amuesa más del poder que tien la música pa trespasar llendes, pa poner a Asturies nel mapa y pa texer rellaciones igualitaries con otros pueblos del mundu. Tamién la importancia que tienen eventos como les Xornaes del Vigulín de L’Infiestu porque, cuando la música’l país sema, siempre hai collecha pa recoyer.
Suscríbite a les nuestres novedaes
