Estos díes ta presentándose en redes sociales Llar, una iniciativa dedicada al resurdimientu de la música y les tradiciones asturianes que nagua por atraer y educar a públicos diversos a traviés de clases maxistrales, conciertos y talleres educativos. El miércoles 27 d’avientu va ser la so primer actividá y nella van actuar nel Monasteriu de San Salvador, en Celoriu (Llanes), el pernomáu gaiteru asturianu José Manuel Tejedor y el violinista irlandés de fama mundial Martin Hayes. Les entraes escosáronse namás 4 hores, pero dende MUSICASTURIANA.COM ufrimos un pase doble nun sortéu n’Instagram en collaboración con Llar.
A les 19h va arrancar esti conciertu que dende la organización presenten como «una velada inolvidable» por mor de que va ser «una actuación acústica dafechu pa somorguiase no fondero y na guapura de la música del violín irlandés». Too ello nun «impresionante marcu históricu», el del Monasteriu de San Salvador, y en compañía de José Manuel Tejedor.
L’eventu nun ye namás un conciertu, sinón tamién el primer actu de recaudación de fondos pa Llar, iniciativa que-y quier dar puxu a la cultura de raigañu a traviés de distintes actividaes. «Anguaño tán recaudándose perres pa cubrir los costes del eventu inaugural, incluyíos los honorarios de lo profesores, y p’apoyar el programa xuvenil, lo que pon de relieve’l compromisu del proyectu pa formar a les xeneraciones futures na cultura asturiana», comenten los promotores de la iniciativa.
Sortéu n’Instagram
Anque les entraes tán escosaes dende va dellos díes, Llar pon a disposición de los siguidores de MUSICASTURIANA.COM un pase doble pa esti conciertu únicu «ambientáu na intimidá del monasteriu». Pa ello namás hai que comentar esta publicación d’Instagram etiquetando a la persona cola que diríes al conciertu enantes del vienres 22 a les doce del mediudía.
Suscríbite a les nuestres novedaes
