Mañana ente les 12.30h y les 18h el CISLAN (Centru Integral de Formación Profesional de Comunicación, Imaxe y Soníu de Llangréu) va acoyer la quince edición del so concursu de maquetes. Alba Moral, Terrenal y Paradox son los finalistes d’esti gallardón que «promueve una actividá intercíclica qu’avera al alumnáu a entornos profesionales». El montaxe failo l’alumnáu de primeru de los ciclos superiores d’Iluminación, Captación y Tratamientu d’Imaxe y Soníu p’Audiovisuales y Espectáculos, y el xuráu ta formáu por tres profesores del CIFP CISLAN -Diego González, David Díaz y Antón Rodríguez-, y dos representantes del Ochobre Fest: Eduardo Iglesias y Sergio Blanco.
El premiu principal inclúi la grabación d’una maqueta de cuatro temes nos estudios del CISLAN, la producción y realización d’una sesión de semeyes, la producción musical pa una plataforma de streaming agospiada na web d’esti centru educativu y la producción de dos conciertos a lo llargo de 2024. El premiu del públicu inclúi la producción y realización d’una sesión fotográfica. Toles recompenses van tar desendolcaes pol propiu alumnáu del CISLAN, fomentando asina la so participación y esperiencia en proyectos musicales, audiovisuales y de producción d’eventos.
Suscríbite a les nuestres novedaes
