Del 3 al 6 setiembre Les Arriondes acueye la tercer edición de la Romería Cuir, festival cultural y deportivu LGTBIQ+ que programa conciertos, actividaes al aire llibre, talleres, alderiques, mercadín y cine a lo llargo de «cuatro díes de folclore, deporte y disidencia», como anuncia la organización. La música asturiana va tar otru añu más presente nesti eventu y nesta ocasión va ser la bandina Los Muiles la que va poner son a la cita’l domingu 6 de setiembre, a les 14.30h, pa poner el ramu al eventu.
Amás de Los Muiles, la Romería Cuir tamién programa música de raigañu d’otros territorios. Asina ye como’l vienres 4 a les 23h toquen Delameseta, grupu formáu por dos xóvenes vallisoletanos que presenten la so propuesta como «folclorismu urbanu» y que percuerre los soníos de Castiella dende una perspectiva actualizada. Enantes del so conciertu celébrase un taller de baille tradicional al cargu d’Eva Outeiro, artista gallega que ye una de les persones que ta detrás de la organización del Alcuentru Trad-Urbán, la xuntanza anual ente les músiques populares gallegues y asturianes.
Un taller de bolos asturianos, una espicha y la pinchada de DJ La Güeriata completen les actividaes con identidá asturiana d’esti festival entamáu por una asociación creada 2023 pa organizar esti eventu anual «nel que se dan la mano la ruralidá, el deporte, la diversidá, el folklore, los lligueros, la esencia reivindicativa y la gayola d’axuntase».
Suscríbite a les nuestres novedaes
