Leticia Baselgas y Rubén Bada asoleyaron en 2018 un discu que llegó a la escena folk asturiana pa valtiar munchos conceptos sobre la manera de pensar y interpretar la música tradicional que paecíen pegoyos fundamentales y cuasique incuestionables. post-folk-asturianu suponxo un cambiu de paradigma que recueyen especialmente les nueves xeneraciones folk, influenciando los sos proyeutos y llegando hasta a protagonizar un TFG de la Universidá d’Uviéu. P’afondar nestes cuestiones, falamos cola cantante y panderetera Celia Corrales (Abéu, Draque) y el guitarrista Pablo Fernández (Alienda, Nieru), dos músicos de la escena moza asturiana que nos apurren les claves sobre la so relevancia. Con esti trabayu siguimos la estaya de discu del mes; na qu’analizamos dalgunos de los trabayos discográficos más destacaos de la música asturiana y acompañándolos d’una ufierta na tienda online.
¿Qué significó pa ti esti discu cuándo salió? ¿Y agora cola perspectiva del pasu del tiempu?
Hubo dellos pioneros na fusión de la música tradicional con otros xéneros, pero creo que nengunu tuvo un resultáu tan bonu y natural como esti discu. post-folk-asturianu marcó un enantes y un depués porque llegó a muncha xente, oyentes que nunca simpatizaren cola tradición oral nin tampoco col blues, pero esta mezcolanza yera tan impecable que resultó hipnótica pa tolos oyíos. Nun facía falta que fora pop pa que toos percibiéremos qu’aquello yera material del bono.
Agora pienso lo mesmo. Quiciabes ye ún de los discos de música n’asturianu que más sentí, y siempres alcuentro dalgún detalle nuevu col que pienso «esti discu ye una obra d’arte». Anguaño yá ye mui valoráu, pero creo que dientro de venti va ser un discu de referencia.
¿Cuála pienses que ye la so mayor aportación a la escena musical folk asturiana?
Pienso que la escena de la música folk y la música tradicional taben notablemente más dixebraes enantes de l’apaición d’esti álbum. L-R rompió eses fronteres porque ficieron el so güecu nes programaciones de música folk, pero tamién taben mui cotizaos nos conciertos pal baille. Foi esti discu’l que permitió que la música pal baille tradicional nun tuviera llimitao a pandereta, voz -lo más paecía posible a la de les informantes-, gaita, tambor o, nes ocasiones más especiales, vigulín.
«Pienso que la escena de la música folk y la música tradicional taben notablemente más dixebraes enantes de l’apaición d’esti álbum. Permitió que la música pal baille tradicional nun tuviera llimitao a pandereta, voz, gaita, tambor o vigulín»
¿Observes qu’hai continuidá de la so idega en dalgún de los proyectos emerxentes anguaño?
Ta claro que sí, y nun hai que conocer muncho pa dase cuenta. Hai grupos que tienen clares influencies o hasta riffs de guitarra similares. Nos mios proyectos, por exemplu, siempre mento a L-R, n’especial esti discu, porque impactóme tanto la so propuesta que m’animó a entamar la mio idega.
«Esti discu demostróme que la pandereta nun tien llendes. Agora vémosla en dellos estilos y en toos tien cabida si se fai bien y con gustu. Diome puxu pa defender el mio sitiu como panderetera»
¿Cómo t’influyó o inflúi como intérprete?
Sirvióme, sobre too, pa demostrame que la pandereta nun tien llendes, que toles afirmaciones de que la pandereta ye namás compatible colos cantares y instrumentos tradicionales yera eso, una dinámica tradicional y impuesta, pero non una verdá absoluta. Agora vémosla en dellos estilos -electrónica, pop, rock, blues…- y en toos tien cabida si se fai bien y con gustu. Esti discu diome puxu pa defender el mio sitiu como panderetera.
¿Qué significó pa ti esti discu cuando salió? ¿Y agora cola perspectiva del pasu del tiempu?
La verdá ye que cuando salió esti discu yo tovía nun taba en contactu cola escena a la que pertenez. Anque’l discu tien una sonoridá mui rockera, ye más cenciello llegar a él dende l’ámbitu tradi o folk, asina que nun m’enterara. Foi cuatro años más tarde cuando cayí nel frikismu “folki”, poco dempués del llanzamientu del so segundu álbum. Tuvi un contactu casi inmediatu, nun tardé en descubrilos porque yera una de les novedaes fuertes na escena, y notábase, porque veíes que los sentía muncha xente mozo, veíes les canciones acompañando stories d’Instagram…
Pasaron seis años y sacaron otros dos discos. Pue paecer que ye pronto pa dicilo, pero yo creo que non: ye un finxu. Amestar una guitarra eléctrica con pandereta y voz nun yera daqué nuevo na música asturiana, sabémoslo, pero pienso qu’esti discu asentólo con esi estilu nuevu, y xenerar un estilu dientro de la escena ye algo mui “heavy”. Amás, préstame muncho que dixeren: vamos facer esto y vamos llamalo asina. Asina nun tien que venir naide a catalogar.
¿Cuála pienses que ye la so mayor aportación a la escena musical folk asturiana?
Ye una entruga difícil. Pienso que traxo munches coses, tamién fuera de lo puramente musical. La estética, tola reflexión que ficieron Leti y Rubén sobre la so actividá, el so papel dientro de la tradición, el cambiu na manera de cantar música tradicional, el cuestionase si se fai solamente una tresmisión de los cantares o si pueden cantase con una voz propia -que los resignifique quiciabes-…
No musical, asentó una manera de trabayar cola música tradicional, otru nuevu estilu. Nos 80, tuvimos grupos qu’entamaron a sumase a la fola del celtismu; llueu, nos 90, otros que cambiaron el xeitu col que s’iguaben los temes -sobremanera no referío a la cuerda-. Nos 2000, asentóse’l folk de cámara, y tamién grupos qu’incorporaben bateríes, discos qu’esploraron cola electrónica; y a finales de la década del 2010, tenemos esti discu qu’entemez rock o blues con una muñeira tan naturalmente que paez que siempre se tocara asina.
«Pienso que traxo munches coses: la estética, tola reflexión que ficieron sobre’l so papel dientro de la tradición, el cambiu na manera de cantar música tradicional, el cuestionase si se fai solamente una tresmisión de los cantares o si pueden cantase con una voz propia… No musical, asentaron un nuevu estilu»
¿Observes qu’hai continuidá de la so idega en dalgún de los proyectos emerxentes anguaño?
Sí, por supuesto. Consiguió una personalidá propia dientro de la escena y creo qu’influyó na manera de pensar nos grupos “tradis” o “folkis” a nivel de tipu de formación, na manera de trabayar cola pandereta, cola voz, etc. Y tovía ye pronto, pienso. Hai que dexar que calen tovía más esos tres discos nes xeneraciones moces. Amás, al mio paecer, lo más importante ye que s’afite la idega de que la música tradicional ta pa esfrutala, y que tan importante ye conservala y caltenela como facer coses nueves. Cantalo d’otru xeitu, acompañalo con toques nuevos, sacar puntos nuevos, qu’una guitarra eléctrica sirva tamién pa tocar pal baille.
«Lo más importante ye que cale la idega de que la música tradicional ta pa esfrutala, y que tan importante ye conservala y caltenela como facer coses nueves. Cantalo d’otru xeitu, acompañalo con toques nuevos, sacar puntos nuevos, qu’una guitarra eléctrica sirva tamién pa tocar pal baille»
¿Cómo t’influyó o inflúi como intérprete?
La verdá que Rubén foi pa la llista de referencies al poco d’entamar a sentir música folk porque pa min, tando formáu nel ámbitu de conservatoriu, tocar con púa foi daqué colo que tuve -y tengo- que bregar. Cuando sentí dellos temes de L-R o DRD, decateme de que munchos taben tocaos con técnica de deos o combinando les dos y dixe: ¡Meca! Tamién pue facese folk -o post folk- asina. Sentíalo más cercano, como otros guitarristes como Xel Pereda o Juan Yagüe -que tamién mezclen eses técniques- y nun son munchos los temes de folk nos que s’empleguen, asina que suelen prestame.
Suscríbite a les nuestres novedaes
