La Banda Sonora de Xicu Ariza

Xicu Ariza (Xixón, 1989) lleva venceyáu a la música asturiana dende los 15 años. Foi guitarrista nos grupos Ásperos y Fala Non Caduca; creó’l fanzine musical Fechu n’Asturies y llueu cuando emigró a Bilbao a estudiar Periodismu reconvirtiólo na web Fnast.net -antecedente de Musicasturiana.com-; organizó conciertos con Ixuxú Asturies-Euskal Herria Elkartea y Glayíos/Oihuak (agora Ixuxú Cultura); trabayó en Madrid como coordinador d’una discográfica d’ámbitu estatal y foi nesi momentu, hai 7 años, cuando fundó Musicasturiana.com.

Pa festexar esti aniversariu, siguimos con él cola estaya «La Banda Sonora De…«, una serie d’entrevistes de personalidá acompañaes d’una playlist de Spotify na que cada persona entrevistada escueye los 20 cantares que más-y marcaron.

Sienti la playlist La Banda Sonora de Xicu Ariza

Un discu qu’enxamás canses de sentir.

Banzai de Gata Cattana. Nun hai selmana que nun suene na oficina; especialmente los llunes si’l fin de selmana foi intensu. Una gran pérdida la d’esta rapera, que siempre va ser eterna.

Si tuvieres que formar parte d’otru proyectu musical, ¿cuál sería?

Prestaríame mui muncho tocar nun grupu qu’amestara punk, electrónica y rap. Dalgo del rollu de The Prodigy, Die Antwoord o Nakar; col que descargar muncha enerxía enriba l’escenariu y blincar muncho. Sicasí, cola guitarra poco más sé que tocar ska, reggae y punk… Asina que siguiré suañando.

De los cantares que compusisti o interpretes, ¿cuál ye’l to preferíu?

«Ánxeles de la guardia», del discu Tiempu de povisa de Fala Non Caduca. Cuando compusi la base d’esi tema taba mui pifiáu a la música surf y prestóme enforma sacar un riff d’esi calter. Gústame como empasta colos otros ritmos que suenen nel tema y coles melodíes de vientu del estribillu.

«Tarrezo les reuniones, los actos oficiales, la burocracia y los conflictos; asina que camiento que sería bastante frustante pa mí tener un cargu políticu de tanta esposición»

¿Cuándo foi la primer vez que xubisti a un escenariu y que pasó enantes, durante y dempués?

La primer vez en sí foi cola escuela de música Rigodón de La Calzada, camiento que pa tocar dalguna cosa con partitura. Pero la vegada que pa mí foi la primera de verdá foi el 2 d’agostu de 2005, con quince años, cuando entamamos el Konziertu Mozu nel que tocamos Ásperos xunto a Adizión Etílika y Help 112. Enantes foi facer tol curro d’organización y sentir la ilusión d’enllenar de collacios y collacies el Cascayu de Cimavilla; durante nun lo disfruté muncho porque siempre fui pa dalgunes coses mui autoesixente y eso tórgame disfrutales; y dempués foi un post-conciertu mui memorable del que nun se pue cuntar públicamente lo qu’ellí pasó. Pasámoslo mui bien y foi l’antecedente de munchos de los post-conciertos que vivimos llueu con Fala Non Caduca.

¿Qué ye lo más inxusto de ser artista?

Que gran parte de la sociedá nun entienda que la cultura ye un sector con muncho potencial económicu, cultural y social y tener menos oportunidaes llaborales que n’otros sectores si quies dedicate esclusivamente a ello; especialmente n’Asturies.

Si fueres Conseyeru de Cultura, ¿qué son les primeres coses que fadríes?

Tarrezo les reuniones, los actos oficiales, la burocracia y los conflictos; asina que camiento que sería bastante frustante pa mí tener un cargu políticu de tanta esposición. Sicasí, llevo unos cuantos años teniendo conversaciones con xente de la industria musical, conozo problemátiques, necesidaes y propuestes, forméme académicamente nesta cuestión, vi esperiencies d’otres comunidaes autónomes… Asina que plantegar, diseñar y implementar polítiques culturales ensin esa esposición pública sí que me prestaría. Les primeres coses que faedría yá les plantegué nel documentu Propuestas políticas de urgencia para la cultura asturiana, un Anexu que fici al Informe a la Xunta Xeneral del Principáu d’Asturies. La necesidad de apostar por el desarrollo de las Industrias Culturales y Creativas Asturianas.

«Siempre digo qu’ensin Dixebra, ensin Ska-P y ensin el Xabarín Club, la mio vida sería mui distinta»

Enantes de ser artista de la música asturiana, de xuru que sentisti o visti en directo a más compañeros y compañeres d’esta escena. ¿Quién te marcó y t’animó a xubir al barcu de facer música n’asturianu?

Dixebra -siempre digo qu’ensin ellos, ensin Ska-P y ensin el Xabarín Club, la mio vida sería mui distinta- y Skontra, que llevo viéndolos en directo dende que teníen la maketa y daben conciertos nel Bola 8 de Cimavilla.

Yá conocemos les tos recomendaciones y influencies… agora toca que te confieses: ¿cuál ye esi cantar o esi grupu qu’escuches culposamente “na intimidá”?

Durante un tiempu dábame vergoña reconocer que me prestaba Ms Nina, pero agora yá nun m’avergoño de nada, hasta de reconocer lo muncho que me mola Bad Bunny,

¿A qué personaxe públicu convidaríes a un conciertu tuyu, a pasar llueu pel backstage y pa qué?

Nun soi nada d’ídolos ni mitomaníes. Parezme que la combinación de «Pola» -aprovecho pa recomendar el documental Hay que armala, onde cunta les tortures que sufrió por ser sindicalista en tiempos de psocialismu- y de Vicente Díaz xuntos nun backstage pue dar pa munches rises.

Yá qu’escoyisti la to Banda Sonora Vital, vamos rematar con una Banda Sonora Orixinal. ¿De qué llibru n’asturianu prestaríate qu’hubiere una película a la qu’amás pongas-y tú la BSO?

Del relatu Odio a los putos asturianos de David Artime «Roxu» que ta publicáu nun númberu de la revista Lliteratura de l’Academia de la Llingua Asturiana. Faedría-y un tema a ritmu de corrido tumbado, na onda de Peso Pluma.

Asina fala Xicu Ariza de los cantares qu’escoyó pa la so playlist

Dixebra – Indios. Siempre digo que ye’l mio cantar preferío. Un temazu con una lletra que desplica perbién a los «revolucionarios de mando a distancia» lo que ye pertenecer a un país y a una clase.

Skontra – Unidá. Un himnu a l’amistá que 20 años dempués sigue respigándome y faciéndome que me venga arriba.

Skama la Rede – Internacionalista. Mui bona lletra -David Artime «Roxu», enorme escritor que ye una suerte tenelo n’Asturies- y un son con tola personalidá de los inconfundibles Skama.

La Tarrancha – Somos. Anque eche de menos a los tarrancheros más ska-reggae, a vegaes meter distorsión fae-yos parir himnos como esti.

Soncai System – The Real Xixón Sound. Discazu. Pena qu’esti proyectu quedara en namás dos discos y nun se pudiera ver en directo.

Nacho Vegas – Vinu, cantares y amor. Enar y yo descubrimos esti cantar cuando vivíemos en Madrid. Sonó en bucle y sigue acompañándonos güei. Prestóme especialmente que va poco versionáralo n’euskera Anari, una de les mios artistes euskaldunes «fetiche».

Felpeyu – Los fayeos de mayo. Poco que decir d’esti temazu que nun se dixera yá… en pasando’l Negrón pa tornar dafechu p’Asturies dempués de 12 años d’emigración lo primero que fici foi poner esti cantar… piénsolo y sigo emocionándome.

Algaire – Llume. Un cantar musicalmente redondu.

Llevólu’l Sumiciu – Saldiguera. Yá yera mui fan de lo que facía Fruela 757 y ye una suerte qu’haiga xente mozo que siga’l so camín con puxu.

Alicia Villanueva y Luis Álvarez Pola – Al pasar por el puertu. Una de les coses de les que más arguyosu me siento dende que monto rollos ye del conciertu que dieron Alicia Villanueva y Luis Álvarez Pola p’abrir el I Semando Son. Foi una pasada ver la Lata de Zinc enllena xente nun absolutu silenciu pa sentir asturianada. Esta versión de La Busdonga llévame a esi momentu.

Hevia – Busindre Reel. L’himnu millenial de la música asturiana.

Nuberu – Asturies, tiempu de nosotros. Pues eso, que faigamos un ríu toos coles manes y el mugor.

Ska-P – Paramilitar. Con 8 años pidi-y a mio ma que me regalara’l discu Eurosis de Ska-P y alcuérdome que-y preguntaba que qué yera un paramilitar… Tardé unos cuantos años en topar la respuesta, pero Ska-p plantaron una semiente de conciencia social d’aquella que llueu xorrecería.

Rage Against The Machine – Sleep Now in The Fire. Rap, rock, metal y llucha. Too xunto, gloria. Amás con 11 o 12 años marcóme tol españíu del hiphop estatal (con Doble V y demás), del nu metal (Limp Bizkit, Linkin Park…) y de punk-rock californianu (The Offspring, Blink 182, Sum 41…), asina qu’una referencia asina ye obligada.

Barricada – No hay tregua. Otra de les mios canciones preferíes de siempre; y El Drogas, de los cantantes que más me presten (anque nun cante esti tema de lletra bonísima)

Extremoduro – Dulce introducción al caos. Extremoduro foi’l mio grupu preferíu de l’adolescencia y anguaño toi pifáu a Robe. Col pasu del tiempu quédome cola etapa d’Extremoduro posterior a La Ley Innata. Será la vieyera.

Doctor Deseo – Corazón de tango. N’homenaxe a los años que viví en Bilbao. Enorme frase esa de «vamos a engañarnos y dime mi cielo que esto va durar siempre»

Skakeitan – Mundu berri baten mapa. La escena euskaldun marcóme muncho en cuantes a gustos musicales y tamién profesionalmente, porque ellí deprendí munches coses de cómo trabayar cola industria musical. D’ente los munchos cantares a escoyer, quédome con esti de Skakeitan porque esti grupu representa pa mí munches coses. Fala Non Caduca compartimos escenariu con ellos nel gaztetxe d’Azpeitia en 2009 cuando ellos entamaben; participé na organización de 8 conciertos suyos; y tuvieron una evolución musical mui interesante y valiente. Anguaño yá nun toquen xuntos, pero los proyectos que nacieron d’esi grupu -Olatz Salvador, Merina Gris, Marte Lasarte y La Txama-, amuesen lo grandes músicos que son.

Zea Mays – Elektrizitatea 25. Zea Mays ye de los grupos que más me respinga en directo, «Elektrizatea» ye’l mi cantar preferíu d’ellos, y nesta playlist que fici son too paisanos (anque anguaño ye verdá que la mayoría de música que siento ta fecha por muyeres); asina que yera obligación escoyer la reinterpretación d’esti tema nel que ponen voz una montonera de muyeres de la música euskaldun.

Eskorbuto – Cuidado. Nun me presta nada’l nihilismu eskorbuteru nin la so actitú; pero soi de raigañu punki y esti tema gústame muncho por eso del «Cuidado, os avisamos, somos los mismos que cuando empezamos».