Dempués de «El mio camín» d’Algaire, «Al pasar el puertu» d’Alicia Villanueva y Luis Álvarez Pola y «Trípticu II. Aguadores» de Loína, aporta l’últimu adelantu del compilatoriu de música moza n’asturianu, Semando Son: «Olga» de Llevólu’l Sumiciu. El dúu d’electrónica de raigañu presenta una reinterpretación de «Olga» cantar qu’orixinalmente ta nel discu Severina de Mapi Quintana & Elías García. Semando Son va presentase esti sábadu nel Reguerada Fest y dende’l llunes 16 va tar disponible en toles plataformes musicales.
El primer compilatoriu de música moza n’asturianu, Semando Son ye un discu editáu por musicasturiana.com qu’inclúi tres cantares inéditos de caún de los grupos que tocó na primer edición del Semando Fest: Alicia Villanueva y Luis Álvarez Pola, Loína. Algaire y Llevólu’l Sumiciu. Hasta’l domingu 15 pue acutase en preventa na tienda online a preciu rebaxáu de 10 € y llueu d’esi día’l preciu va xubir a 13 €.
Nel Semando Son, compilatoriu de música moza n’asturianu axúntense 12 temes d’estilos estremaos -tonada, folk de cámara, música tradicional fusionada y electrónica de raigañu- pa reflexar la diversidá estilística de los sones del país. La característica común ye que los componentes de los grupos tienen menos de 35 años. D’esta manera, la iniciativa trata de puxar pol relevu xeneracional na música asturiana y promocionar los nomes nuevos d’esta escena; faciendo alcordanza tamién d’aquellos CDs qu’editaba Discos L’Aguañaz nos años 90 baxo’l nome de Nuevu Folk Asturianu.
L’album grabóse’l pasáu xunetu nos Tutu Estudios de Corvera baxo la producción Sergio Rodríguez, el diseñu y maquetación ye obra de la ilustradora xixonesa Cecilia Diaz y la producción executiva ye de Xicu Ariza, responsable de musicasturiana.com, proyectu qu’estrena asina la so xera discográfica. El trabayu destaca tamién porque va ufrir los primeros temes d’Alicia Villanueva, Luis Álvarez Pola y de Loína, formaciones qu’enxamás paseren pel estudiu de grabación; y porque recueye cantares inéditos d’Algaire y Llevólu’l Sumiciu.
Singles, versiones y preventa
Amás de la preventa a preciu rebaxáu, musicasturiana.com va dir asoleyando hasta’l llanzamientu adelantos del discu en plataformes dixitales y pequeñes entrevistes colos artistes participantes. Asina van dir conociéndose los detalles d’esti discu que supón tou un viaxe pela música’l país: entama per una interpretación de l’asturianada «Al Pasar El Puertu» -que grabó va 100 años La Busdonga– y remata con soníos electrónicos que sampleen a vieyes y nueves voces d’esta escena. Pel mediu va haber tamién versiones d’otros cantares de dientro y fuera d’Asturies gracies al llabor d’Alicia Villanueva y Luis Álvarez Pola, dos de los nomes que protagonicen el relevu xeneracional na tonada asturiana; Loína, tríu acústicu de folk atlánticu; Algaire, banda de música tradicional fusionada; y Llevólu’l Sumiciu, dúu qu’amesta música electrónica y asturiana
Suscríbite a les nuestres novedaes
