Maqueta ‘Niko’ (1995), l’underground de la música d’espresión asturiana

Dixitalizamos esta maqueta na que les caxes de ritmos, los ambientes electrónicos, los samples, la ironía y el surrealismu son la norma

Entregues

El documentu sonoru qu’asoleyamos agora nel AMCA trátase de la maqueta de Niko, proyectu esperimental que nos primeros 90 amestó electrónica y spoken word.

Incorporamos al Archivu de la Música Contemporánea Asturiana (AMCA) la segunda maqueta de Niko, grabada nel añu 1995 nos Estudios EPROM. El responsable d’esti proyectu foi l’avilesín Nicolás Garrido Labrado, que na so segunda y última entrega, tamién en formatu casete, ufierta dos pieces titulaes ‘Cabalgando sol tiempu’ y ‘Los nuevos xudes’.

Nelles afonda más na so propuesta, na que les caxes de ritmos, los ambientes electrónicos y los samples son la norma, amestando nesta ocasión soníos de guitarra eléctrica; too ello con una voz ente falada y cantada que va ufiertando lletres a mediu camín ente la ironía y el surrealismu.

Nel so momentu representó l’underground de la música d’espresión asturiana, quedando al marxe dafechu de los soníos qu’imperaben daquella nesta escena. Puede considerase a Niko tou un precursor y pioneru d’estilos qu’anguaño sí tienen mayor trescendencia nel sistema musical del país.