Nel añu 2019 la Fundación Belenos celebraba la venti edición del so Seminariu d’Estudios Asturianos dedicándola al celtismu musical. Asina, a lo llargo de dos xornaes, el 16 y 17 de payares, en La Puela (Ayande) tratábense aspectos estremaos sobre esta cuestión; nelles un grupu d’especialistes faló de la so relevancia y trescendencia pa entender el fechu musical asturianu contemporáneu.
Ún de los actos centrales foi la mesa redonda titulada «El celtismu qu’amerita: la música celta en tiempos del post-folk», na que participaron l’escritor y miembru de la Fundación Belenos Ignaciu Llope, el director del Muséu de la Gaita Fonsu Fernández, el músicu y director del Anuariu de la Música Asturiana Xune Elipe, el delegáu n’Asturies del Festival Intercélticu de Lorient Iñaki Santianes, el músicu y etnógrafu Xosé Ambas, y la panderetera y musicóloga Leticia Baselgas, actuando como moderador el gaiteru y musicólogu Llorián García.
A lo llargo de la conversación pudieron visibilizase dos visiones sobre’l fechu musical asturianu marcaes por un cambiu xeneracional y de discursu; d’un llau los partidarios del celtismu sonoru como paradigma y base sobre la que trabayar y, per otru, la xeneración del post-folk, abierta a otres munches influyencies.
Dao’l so interés, en collaboración cola Fundación Belenos, ufiertamos nel Archivu de la Música Contemporánea Asturiana (AMCA) l’audiu d’aquella mesa redonda.
Suscríbite a les nuestres novedaes
