L’intérprete madrilanu Víctor Rafael Martín Ruiz ta acabante de publicar el llibru Manual de composición para gaita asturiana, col que busca que los compositores puedan crear melodíes pa esi instrumentu ensin ser necesariamente gaiteros, como asocede con cualquier otru. Nos sos conteníos fálase de les dos partes sonores fundamentales de la gaita -el soníu del roncón y el del punteru-, de cuáles son les tonalidaes más utilizaes según el tonu de la gaita utilizada, de la tesitura, de los tipos de compases más emplegaos, de los pasos de notes más complicaos. Otru de los temes trataos ye l’orixe de los ritmos más utilizaos na música asturiana, acabando’l volume cola figura del musicólogu Eduardo Martínez Torner y la so influyencia importante nes formaciones musicales, ente elles les bandes de gaites.
El manual ábrese con un prólogu de José Ángel Hevia, nel que fai la entruga: ¿hai que nacer n’Asturies pa tocar la gaita asturiana?, pa darréu falar del oxetivu del llibru afirmando que «Un músico que se aproxime a nuestro instrumento busca en primer lugar a alguien que le oriente, alguien a quien escuchar entorno a las necesidades del instrumentista y a las posibilidades del instrumento. Cuando esto no se hace, ocurre no sólo fuera de Asturias, sino también dentro, se termina componiendo una melodía, cuando menos, antinatural, artificiosa, generada por una digitación en un teclado que poco tiene que ver con las cadencias, la interválica, la ornamentación y los modos de hacer de un gaitero».
Dase la circunstancia de que Martín Ruiz nun tien nenguna rellación con Asturies, interesándose pola gaita por cuenta de la so afición a la música celta. Esti interés llevólu a formase, primero, con José Manuel Tejedor y, depués, cursando estudios de Gaita Asturiana nel Conservatorio Profesional de Música d’Uviéu.
Suscríbite a les nuestres novedaes
