Yá ta na cai II, el segundu trabayu discográficu de la banda post-rock Melandru. La formación maliaya publica güei en toles plataformes musicales un trabayu que, en pallabres del so gaiteru, Álvaro Cueto, ta formáu por cinco temes nos que «l’estilu sigue siendo’l post-rock, pero agora lleva un camín daqué menos escuru; con más contraste ente lluz y escuridá que l’anterior EP». La presentación en directo va ser el 25 de mayu nel Teatru Riera de Villaviciosa.
Va unes selmanes Melandru publicaba’l single «Shinji sube al EVA«, nel que podía sentise «un xiru estilísticu, con influencies de la electrónica, el shoegaze o’l dream pop; con testures denses y cambiantes», como comentaba la formación. Cola publicación de II estes novedaes afítense, al ser un trabayu con más instrumentalización y mayor diversidá sonora que’l so debú discográficu de 2018.
Con esti álbum el grupu sigue afondando na so propuesta caracterizada por tener un soníu envolvente, delles veces raspiando lo escuro, onde prima lo instrumental, anque la voz tamién tien el so espaciu. Pente la so instrumentación destaca l’emplegu de la gaita tradicional, que-y aporta personalidá y un toque orixinal, más cuando apaez nun contestu ayenu dafechu a lo tradi. El resultáu final ye un ambiente sonoru averáu al llamáu post-rock, pero con delles testures acústiques qu’aporten el contrapuntu a los pasaxes más crudos; too ello apórta-yos singularidá dientro del rock fechu en llingua asturiana.
Suscríbite a les nuestres novedaes
